Xəzər Universitetində böyük Azərbaycan şairi və filosofu Xaqani Şirvaninin yaradıcılıq  irsinə həsr olunmuş “Xaqani qəsidələri” mövzusunda 2026-cı il mayın 14- də açıq dərs olub . Dillər və ədəbiyyatlar departamentinin müəllimi, İran dilləri və ədəbiyyatı üzrə fəlsəfə doktoru Rüstəm Lazımovun tədris etdiyi “Azərbaycan ədəbiyyatı tarixi – Klassik dövr” fənni çərçivəsində təşkil olunan açıq dərsin əsas məqsədi Xaqani Şirvaninin zəngin ədəbi-fəlsəfi irsi barədə  tələbələrə daha əhatəli bilgi vermək, onun klassik Azərbaycan ədəbiyyatındakı yerini və yaradıcılıq xüsusiyyətlərini təhlil etmək olub.

Açıq dərsdə Azərbaycan ədəbiyyatının intibah dövrünün parlaq nümayəndəsi hesab olunan Xaqani Şirvaninin əsərlərindəki bədii və fəlsəfi xüsusiyyətlərdən də bəhs edilib. Eyni zamanda, klassik ədəbiyyatda qəsidə janrını zirvəyə yüksəldən şair-filosofun qəsidələrindən biri geniş şəkildə təhlil olunub.

Dərsdə Humanitar, təhsil və sosial elmlər fakültəsinin dekan müavini Sevinc Allahverdiyeva də iştirak edib.

Qeyd edək ki, keçilən açıq dərs Xaqani Şirvaninin 900 illik yubileyinin geniş şəkildə qeyd edilməsi  ilə bağlı dövlət başçısının  imzaladığı  Sərəncama uyğun olaraq, ölkənin müxtəlif elm və təhsil müəssisələrində keçirilən silsilə tədbirlərin davamı kimi xüsusi əhəmiyyət daşıyır.