Beynəlxalq əlaqələr ofisinin təşkilatçılığı ilə 2026-cı il mayın 15- də Türkiyənin İstanbul Esenyurt Universiteti prorektoru və İnnovasiyaların İdarə Edilməsi və TRIZ İnstitutu İdarə Heyətinin sədri Prof. Dr. Ali B. Kutvan Xəzər Universitetində  olub.

Görüşdə Xəzər Universitetinin rektoru Dr. Raziyə İsayeva, tədris işləri üzrə prorektor Prof. Məhəmməd Nuriyev və Beynəlxalq əlaqələr ofisinin müdiri Dr. Firuz Süleymanov iştirak ediblər.

Səfər çərçivəsində İstanbul Esenyurt Universitetinin nümayəndələri universitetləri  haqqında ətraflı təqdimatla çıxış ediblər. Bildirilib ki, universitetdə 15 minə yaxın tələbə təhsil alır və onların əhəmiyyətli hissəsini əcnəbi tələbələr təşkil edir, eləcə də, universitetin 90-dan çox ölkə ilə beynəlxalq əməkdaşlıq əlaqələrinin olduğu, 6 fakültənin fəaliyyət göstərdiyi və onlayn layihə idarəetmə platformasının mövcudluğu diqqətə çatdırılıb.

Tərəflər iki universitet arasında mümkün əməkdaşlıq istiqamətlərini müzakirə ediblər. Görüş çərçivəsində Xəzər Universiteti ilə İstanbul Esenyurt Universiteti arasında Anlaşma Memorandumu imzalanıb. Memorandum akademik və inzibati heyətin, eləcə də tələbələrin mübadiləsi, yay məktəblərinin təşkili, birgə layihələrin hazırlanması, akademik konfrans və seminarların keçirilməsi kimi istiqamətləri əhatə edir.

Görüşün sonunda qonağa Xəzər Universiteti adından xatirə hədiyyəsi təqdim olunub.