2016-cı il aprelin 5-də Xəzər Universitetində NİZAMİ ERASMUS+ “Azərbaycanda doktorantura təhsilinin Avropa Ali Təhsil Məkanı tələblərinə uyğun yenidən qurulması və inkişaf etdirilməsi” layihəsi çərçivəsində əməkdaş universitetlərin növbəti görüşü keçirildi. Tədbirdə Xəzər Universitetinin rəhbərliyi, Azərbaycan Respublikası Təhsil Nazirliyinin əməkdaşları, beş Avropa, bir Türkiyə və doqquz Azərbaycan universitetindən əməkdaşlar, Azərbaycan Milli Erasmus + ofisinin rəhbəri və əməkdaşı iştirak edirdilər.

Xəzər Universitetinin qurucusu, Direktorlar və Qəyyumlar Şurasının sədri professor Hamlet İsaxanlı Azərbaycanda, Avropada, keçmiş Sovet ölkələrində, post-sovet dövründə doktoranturanın yaranması və inkişafı tarixi haqqında iştirakçılara geniş məlumat verdi. Həmçinin, Xəzər Universiteti Magistratura və doktorantura və elmi işlər bölməsinin müdiri Dr.Eldar Şahgəldiyev Azərbaycanda doktorantura təhsilinin vəziyyətinin təhlili haqqında danışdı və Barselona Universitetinin əməkdaşı Dr.Amparo Kortes Lukas “Doktorantura təhsili: kəmiyyət və keyfiyyətin dilemması” adlı məruzə ilə Skype vasitəsilə çıxış etdi. Konfransda, həmçinin, Təhsil Nazirliyinin nümayəndəsi və digər iştirakçılar da geniş müzakirələrə qatıldılar.

Konfrans öz işini aprelin 6-da da davam etdirəcəkdir.