2026-cı il mayın 15-də Xəzər Universitetinin Siyasi elmlər və fəlsəfə departamentinin təşkilatçılığı ilə “Khazar Talks-4” layihəsi çərçivəsində növbəti akademik seminar keçirilmişdir. Seminarda ABŞ-nin Azərbaycandakı müvəqqəti işlər vəkili Emi Karlon “Amerika Birləşmiş Ştatları: siyasi sistem və Azərbaycan ilə münasibətlər” mövzusunda mühazirə ilə çıxış etmişdir. Tədbir Xəzər Universitetinin Mərmər salonunda keçirilmiş və universitet rəhbərliyi, professor-müəllim heyəti, eləcə də tələbələr tərəfindən böyük maraqla qarşılanmışdır.

“Khazar Talks” layihəsi ilk dəfə 2024–2025-ci tədris ilində Xəzər Universitetinin Siyasi elmlər və fəlsəfə departamenti tərəfindən təsis edilmişdir. Layihə çərçivəsində səfirlərlə görüşlər, akademik seminarlar və kitab təqdimatları təşkil olunur.

Tədbirdən əvvəl ABŞ-nin Azərbaycandakı müvəqqəti işlər vəkili Emi Karlon Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, universitetin rektoru Dr. Raziyə İsayeva, prorektoru Prof. Məhəmməd Nuriyev, Humanitar, təhsil və sosial elmlər fakültəsinin dekanı Dr. Milana Abbasova və Siyasi elmlər və fəlsəfə departamentinin müdiri Dos. Orxan Vəliyev ilə görüş keçirmişdir.  

Tədbir Azərbaycan Respublikasının və Amerika Birləşmiş Ştatlarının dövlət himnlərinin səsləndirilməsi ilə başlamışdır. Xəzər Universitetinin rektoru Dr. Raziyə İsayeva iştirakçıları salamlayaraq, ABŞ-nin Azərbaycandakı müvəqqəti işlər vəkili Emi Karlon`un universitetə səfərinin əhəmiyyətini vurğulamışdır.

Daha sonra Emi Karlon diplomatik fəaliyyəti, həmçinin, son dövrlərdə ABŞ–Azərbaycan münasibətlərinin inkişaf istiqamətləri barədə tədbir iştirakçılarını məlumatlandırmışdır.

Müvəqqəti işlər vəkili auditoriyanın müxtəlif mövzularda ünvanladığı sualları cavablandırmışdır.

Tədbirin yekununda Xəzər Universitetinin rektoru Dr. Raziyə İsayeva Emi Karlon`a universitetin xatirə hədiyyəsini  təqdim etmişdir.

Seminar iştirakçıların birgə xatirə fotosunun çəkilməsi ilə başa çatmışdır.