2026-cı il mayın 12- də Xəzər Universitetində beynəlxalq akademik əməkdaşlıq çərçivəsində Humanitar, təhsil və sosial elmlər fakültəsinin Psixologiya ixtisasında filologiya üzrə fəlsəfə doktoru Gülşanə Xudiyevanın tədris etdiyi Azərbaycan ədəbiyyatı dərsinin qonaq iştirakçıları  Özbəkistanın Asiya Xalqları Universitetindən gələn müəllim və tələbələr olublar.

Dərs çərçivəsində tələbələr Xumar Kərimli, Ayan Yusifli, Esmira Sadullayeva, Fatimə Məmmədova, Hayrunnisa Polat və Sevinc İsayeva Azərbaycanın xalq şairi Bəxtiyar Vahabzadənin həyat və yaradıcılığına həsr olunmuş layihələrini təqdim ediblər. Təqdimatlar zamanı tələbələr şairin həyatı və ədəbi fəaliyyəti haqqında Azərbaycan və ingilis dillərində ətraflı məlumat veriblər.

Layihə çərçivəsində tələbələr Bəxtiyar Vahabzadənin ev-muzeyini ziyarət edərək, oradan çəkdikləri görüntüləri və muzeyin direktoru Elşən Zəkəriyyəbəyli ilə müsahibəni təqdim ediblər.

Dərsin davamında tələbələr şairin 20 Yanvar şəhidi Larisa Məmmədovaya həsr etdiyi şeiri kiçik səhnəcik formasında nümayiş etdiriblər.

Şairin “Sandıqdan səslər” adı altında çap olunan şeirlərindən “Hörümçək tor bağladı”nın  təqdimatı zamanı tələbələrin kiçik sandıqdan istifadə etməsi iştirakçılar tərəfindən maraqla qarşılanıb.

Əyləncəli yarış hissəsində isə özbək tələbələr də fəal iştirak edərək, sualları cavablandırıb və kiçik hədiyyələr qazanıblar.

Dərsin ən yaddaqalan məqamlarından biri “Dağda şəlalə kimi” şeirinin təqdimatı olub. Tələbələrin pantomim dili ilə hazırladıqları səhnəcik öz fərqliliyi və yüksək emosionallığı ilə qonaqların böyük marağına səbəb olub.

Sonda xatirə şəkli çəkdirilib. Özbəkistandan gələn tələbələr  Xəzər Universitetinin tələbələrini öz ölkələrinə dəvət ediblər.