2016-cı il aprelin 5-də “Dünya” məktəbinin İB proqramında təhsil alan tələbələri üçün həmin məktəbdə Xəzər Universiteti haqqında təqdimat keçirildi. Təqdimat Beynəlxalq Əlaqələr Şöbəsi tərəfindən təşkil olunmuşdu.

Xəzər Universitetinin rektoru Dr. Hassan Niknafs iştirakçıları salamladı və öz universitet təcrübələrini bölüşmək üçün dəvət olunan əcnəbi tələbələri təqdim etdi. Tədbirdə iştirak edənlər Kamerun, Qambiya, Hindistan, İran, Nigeriya və Pakistandan olan tələbələr idi. Əcnəbi tələbələr “Xəzər”dəki təhsil təcrübələrindən və təhsillərini davam etdirmək üçün bu universiteti seçmək səbəblərindən danışdılar. Qonaqlar arasında Polşadan olan müstəqil qonaq tədqiqatçı da var idi.

Beynəlxalq Əlaqələr Ofisinin direktoru Turan Cəfərova təqdimat keçirdi və Xəzər Universiteti, fakültələr, yerli tələbələrə təklif olunan proqramlar, həmçinin, resuslar, laboratoriyalar, xidmətlər və tədbirlər haqqında danışdı. Xəzər Universitetinin digər universitetlər arasında yerli, regional və beynəlxalq reytinqlərdə tutduğu yerlər haqqında məlumat iştirakçılara çatdırıldı. Xəzər Universitetinin beynəlxalq əməkdaşlıqları, tələbələr üçün təhsil və mübadilə imkanları barədə geniş məlumat verildi.

Təqdimat sual-cavab sessiyası ilə başa çatdı. İştirakçılara Xəzər Universitetinin təbliğat materialları verildi.