Xəzər Universiteti Erasmus+ mübadilə proqramı çərçivəsində 2026-cı il mayın 4-8-də Türkiyənin Haliç Universitetinin nümayəndəsi Zehra Kılıçaslanı qəbul etmişdir. Səfər çərçivəsində iki ali təhsil müəssisəsi arasında beynəlxalq əməkdaşlıq imkanlarının genişləndirilməsi, təcrübə mübadiləsinin aparılması və gələcək birgə fəaliyyət istiqamətlərinin müzakirəsi olmuşdur.

Səfərin ilk günü qonağa Xəzər Universitetinin Beynəlxalq əlaqələr şöbəsi tərəfindən universitetin fəaliyyəti, beynəlxalq tərəfdaşlıqları, akademik proqramları və Erasmus+ layihələri haqqında ətraflı məlumat təqdim olunmuşdur. Görüş zamanı tələbə və müəllim mobilliyi, beynəlxalq layihələrdə iştirak və gələcək əməkdaşlıq perspektivləri ətrafında fikir mübadiləsi aparılmışdır.

Növbəti günlərdə Zehra Kılıçaslan Xəzər Universitetinin Beynəlxalq əlaqələr şöbəsinin fəaliyyəti ilə yaxından tanış olmuş, beynəlxalq tələbələrlə iş prosesi, mübadilə proqramlarının idarə olunması və tərəfdaş universitetlərlə əməkdaşlıq mexanizmləri barədə məlumat əldə etmişdir. Tərəflər arasında qarşılıqlı təcrübə paylaşımı həyata keçirilmiş və yeni əməkdaşlıq imkanları müzakirə olunmuşdur.

Səfər çərçivəsində “Study in Türkiye and Exchange Opportunities” adlı seminar təşkil edilmişdir. Seminar zamanı Zehra Kılıçaslan Türkiyədə ali təhsil imkanları, Haliç Universitetində təhsil proqramları, Erasmus+ mübadilə imkanları, tələbə mobilliyi və beynəlxalq təhsil təcrübəsinin üstünlükləri barədə tələbə və professor-müəllim heyətinə geniş məlumat vermişdir. Seminar interaktiv müzakirələr və sual-cavab sessiyası ilə davam etmişdir.

Səfərin son günü universitet tərəfindən qonaq üçün Azərbaycanın zəngin tarixi və mədəni irsini tanıtmaq məqsədilə ölkəmizin məşhur tarixi abidələrindən biri olan Atəşgah məbədinə ekskursiya təşkil edilmişdir. Qonağa Azərbaycanın qədim tarixi, mədəni dəyərləri və turizm potensialı barədə məlumat verilmişdir.

Bu cür beynəlxalq səfərlər Xəzər Universitetinin qlobal əməkdaşlıq şəbəkəsinin genişləndirilməsi, tələbə və akademik heyət üçün yeni imkanların yaradılması və beynəlxalq təhsil əlaqələrinin inkişaf etdirilməsi baxımından mühüm əhəmiyyət daşıyır.