Xəzər Universiteti baytarlıq sahəsində kadr hazırlığının gücləndirilməsi istiqamətində mühüm əməkdaşlığa başlayıb. 2026-cı il aprelin 28-də Xəzər Universitetinin rektoru Dr. Raziyə İsayeva və Kənd Təsərrüfatı Nazirliyi yanında  Aqrar Xidmətlər Agentliyinin sədri Sərdar Hacıyev qarşılıqlı əməkdaşlığa dair Anlaşma Memorandumu imzalayıblar.  Memorandumun əsas məqsədi tələbələrin nəzəri biliklərinin praktik bacarıqlarla zənginləşdirilməsi, eləcə də elmi-tədqiqat fəaliyyətinin inkişaf etdirilməsidir. Anlaşmaya əsasən, tərəflər sahə baytar həkimləri, mütəxəssislər və tələbələr üçün müxtəlif təlimlərin təşkili, beynəlxalq təcrübənin tətbiqi, tələbələrin Agentliyin müvafiq strukturlarında təcrübə keçmələrinin təmin edilməsi istiqamətində birgə fəaliyyət göstərəcəklər. Xüsusi fərqlənən tələbələrin elmi layihələrə cəlb olunması və onların peşəkar inkişafına dəstək göstərilməsi də prioritetlər sırasındadır. Eyni zamanda, tərəflər xəstəliklərin idarə olunması, klinik-praktik və elmi-tədqiqat işlərinin aparılması, birgə layihələrin icrası və akademik tədbirlərin təşkili istiqamətində əməkdaşlığı genişləndirəcək.

Memorandum qarşılıqlı səfərlərin təşkili, mövcud maddi-texniki bazadan birgə istifadə, elmi və praktiki xidmətlərin göstərilməsi, eləcə də yeni təşəbbüs və layihələrin həyata keçirilməsini də əhatə edir. Əməkdaşlığın səmərəli icrası üçün hər iki qurumun nümayəndələrindən ibarət İşçi Qrupu yaradılacaq və bu qrup layihələrin koordinasiyası ilə yanaşı, qarşılıqlı informasiya mübadiləsini təmin edəcək.

Xəzər Universitetinin təsisçisi, Direktorlar və Qəyyumlar Şurasının sədri, Prof.Akad. Hamlet İsaxanlının rəhbərliyi ilə keçirilən görüşdə “Xəzər”in  tədris işləri üzrə prorektoru Prof. Məhəmməd Nuriyev, fakültə dekanları- Dr.Çiçək Əliyeva, Dr.Fəxrəndə Əfəndiyeva, Dr. İnqilab Əhmədov, Dr.Milana Abbasova, departament müdiri Dr.Səbinə Məmmədova və Hasvet Baku International Animal Hospital`ın direktoru Mehmet Koçak iştirak edib. Görüş çərçivəsində tərəflər öz təqdimatları ilə çıxış edib, baytarlıq sahəsində mövcud müasir çağırışlar və əməkdaşlığın inkişaf perspektivləri geniş müzakirə edilib. Eyni zamanda, universitetin Hasvet baytarlıq təbabəti fakültəsinin fəaliyyəti ilə tanışlıq olub, tələbələrlə görüş keçirilib və qarşılıqlı fikir mübadiləsi aparılıb.