Xəzər Universitetinin Təbiət elmləri və mühəndislik fakültəsinin I kurs tələbələri “Azərbaycan Tarixi” fənninin tədrisi çərçivəsində Tarix və arxeologiya departamentinin müəllimi Dr. Yaqub Məmmədovun rəhbərliyi ilə 2026-cı il mayın 10-da  AMEA Arxeologiya və Antropologiya İnstitutunun Muzey-Sərgi zalında, Səməd Vurğunun Ev-Muzeyində və Milli Azərbaycan Tarixi Muzeyində olublar.

AMEA Arxeologiya və Antropologiya İnstitutunun İçərişəhərdə yerləşən Muzey-Sərgi zalında Azərbaycan ərazisində aparılan arxeoloji tədqiqatlar nəticəsində əldə olunmuş, Alt Paleolit dövründən Orta əsrlərin sonuna qədərki mərhələləri əks etdirən eksponatlar nümayiş olunur. Bir sıra arxeoloji tədqiqatlarda iştirak etmiş Dr. Yaqub Məmmədov tələbələrə Azərbaycanın arxeoloji irsi haqqında ətraflı məlumat verib,  onların suallarını cavablandırıb.  

sonra tələbələr Azərbaycan ədəbiyyatının görkəmli nümayəndəsi, ilk Xalq şairi, poeziya və dramaturgiya sahəsində yaratdığı əsərlərlə milli-mənəvi dəyərlərin formalaşmasında mühüm rol oynamış Səməd Vurğunun Ev-Muzeyində oldular. Ekskursiya şairin 120 illik yubileyi ilə eyni vaxta təsadüf etdiyindən tələbələr üçün xüsusi əhəmiyyətə malikdir. Muzeyin əməkdaşı Nella Məmmədova tələbələri Səməd Vurğunun həyat və yaradıcılığını əks etdirən eksponatlarla tanış edib.

Milli Azərbaycan Tarixi Muzeyində tələbələr Azərbaycan xalqının tarixi inkişafını əks etdirən zəngin kolleksiya ilə tanış olublar. Burada qədim arxeoloji tapıntılar, orta əsrlərə aid silahlar və sənətkarlıq nümunələri, XIX–XX əsrlərin məişət əşyaları və sənəd materialları nümayiş etdirilir. Ekskursiya zamanı həmçinin, müasir dövrə aid bölmələr də diqqət çəkib. Bu ekspozisiyalarda Azərbaycan Respublikasının dövlətçilik tarixi, müstəqillik dövründə əldə olunan nailiyyətlər, müasir elmi və mədəni irs nümunələri, həmçinin, Qarabağın işğaldan azad edilməsindən sonra bərpa olunan abidələr və yeni arxeoloji tədqiqatların nəticələri təqdim olunub.

Mütəmadi təşkil olunan bu cür ekskursiyalar tələbələrin elmi dünyagörüşünün formalaşmasında mühüm rol oynayır. Onlar nəzəri dərslərdə öyrəndikləri bilikləri real tarixi abidələr və muzey eksponatları üzərində tətbiq etmək imkanı qazanır, bununla da elmi biliklərini praktik müşahidələrlə möhkəmləndirirlər.