Xəzər Universiteti Təbiət elmləri, sənət və texnologiya yüksək təhsil fakültəsi və Neft mühəndisliyi departamentinin təşkilatçılığı ilə doktorant Nicat Qasımlının 2026-cı il mayın 7-də “Səthi aktiv maddənin inyeksiyasının əsasları” mövzusunda seminarı olub.

N. Qasımlı “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Amerika Birləşmiş Ştatlarının Pensilvaniya Dövlət Universitetində “Enerji və Mineral Mühəndisliyi” ixtisası üzrə doktorantura təhsili alır.

Seminarda “Artırılmış Neft Hasilatı” (Enhanced Oil Recovery – EOR) sahəsində ən perspektivli kimyəvi üsullardan biri hesab olunan səthi-aktiv maddələrdən (surfaktantlardan) istifadə etməklə neft hasilatının artırılmasının fiziki mexanizmləri təqdim olunub. Seminarın əsas məqsədi neft laylarında qalıb saxlanılan neftin çıxarılması prosesinin arxasında duran mürəkkəb elmi prinsipləri tələbələrə sadə, aydın və praktik şəkildə izah etmək idi.

Məruzə zamanı surfaktantların hazırlanma prinsipləri, onların optimal kimyəvi tərkibinin duzluluq, temperatur və lay xüsusiyyətləri kimi amillərdən asılılığı ətraflı şəkildə izah edilib. Eyni zamanda, mühəndislərin namizəd reagentləri sahə tətbiqindən əvvəl laboratoriya şəraitində necə sınaqdan keçirdiyi və qiymətləndirdiyi barədə məlumat verilib.

Seminarda tələbələr surfaktant əsaslı neft hasilatının artırılması layihələrinin laboratoriya mərhələsindən sahə tətbiqinədək keçdiyi inkişaf prosesini, eləcə də bu layihələrin uğur və ya uğursuzluğunu müəyyən edən əsas texniki və iqtisadi amilləri daha dərindən anlama imkanı əldə ediblər.