AMEA Folklor İnstitutunda tanınmış musiqişünas, bəstəkar və publisist Elmir Mirzəyevin Almaniyada nəşr olunan “Müasirlik və arxaika arasında: XX əsrdə Azərbaycan musiqi mədəniyyətində transregional təsirlər” kitabının təqdimatı və eyni mövzuda elmi seminar keçirilib. Hibrid formatda təşkil olunan tədbirdə institut əməkdaşları, doktorant və dissertantlarla yanaşı, Xəzər Universiteti və Bakı Slavyan Universitetinin tədqiqatçıları iştirak ediblər.

İnstitutdan AZƏRTAC-a bildirilib ki, seminarı açan Folklor İnstitutunun direktoru filologiya elmləri doktoru Hikmət Quliyev belə görüşlərin humanitar elmlərdə fikir mübadiləsi baxımından əhəmiyyətini vurğulayıb. O, müasir folklorşünaslıqda sosial-mədəni və antropoloji yanaşmaların ön plana çıxdığını, musiqi, performativlik və şəhər folkloru istiqamətlərinin aktual araşdırma sahələrinə çevrildiyini bildirib.

https://azertag.az/xeber/muasirlik_ve_arxaika_elmir_mirzeyevin_kitabi_folklorsunaslarin_tedqiqat_mustevisinde-4177011