Hatay Mustafa Kemal Universitetinin Türk musiqi departamentinin nümayəndələri Hasan Görkem Erdem və Oğuzcan Kaliveri Erasmus+ mübadilə proqramı çərçivəsində 2026-cı il aprelin 20-də  Xəzər Universitetində olublar..

Görüşdə Xəzər Universitetini İncəsənət və musiqi departamentinin müəllimi Zülfiyyə Sadıqova və Beynəlxalq əlaqələr şöbəsinin koordinatoru Fidan Cəfərova təmsil  ediblər.

Xəzər Universitetinin ümumi təqdimatından sonra onun akademik fəaliyyəti, beynəlxalq əməkdaşlıq istiqamətləri və Erasmus+ proqramı çərçivəsində həyata keçirilən layihələr barədə ətraflı məlumat verilib.

Görüş çərçivəsində Türk və Azərbaycan musiqi mədəniyyətləri haqqında geniş fikir mübadiləsi aparılıb. Azərbaycan muğam sənətinin zənginliyi, dərin fəlsəfi və emosional ifadə imkanları, eləcə də Türk xalq musiqisi ilə ortaq köklər və fərqli inkişaf xətləri müzakirə olunub.

Qeyd edilib ki, Azərbaycan musiqisi özünəməxsus melodik dili, qədim muğam ənənəsi və müasir bəstəkarlıq məktəbi ilə dünya musiqi mədəniyyətinə mühüm töhfələr verir,  beynəlxalq səviyyədə getdikcə daha geniş tanınır. Eyni zamanda, bu zəngin irsin müxtəlif beynəlxalq platformalarda təqdim olunması mədəniyyətlərarası dialoqun güclənməsinə xidmət edir.

Görüş zamanı Azərbaycan bəstəkarlarının əsərləri və Türk türküləri dinlənilib, musiqinin tərəflər arasında körpü rolu oynadığı xüsusi vurğulanıb.

Sonda xatirə fotosu çəkilib və belə akademik-mədəni görüşlərin gələcəkdə də davam etdirilməsinin önəmi qeyd olunub.