Erasmus+ mübadilə proqramı çərçivəsində Rumıniyanın Rumın-Amerikan Universitetinin Beynəlxalq əlaqələr ofisinin nümayəndəsi Ümid Məmmədov 2026-cı il aprelin 13- 17-də Xəzər Universitetində olub. Səfər iki ali təhsil müəssisəsi arasında beynəlxalq əməkdaşlığın inkişaf etdirilməsi, təcrübə mübadiləsinin aparılması və gələcək tərəfdaşlıq imkanlarının genişləndirilməsi məqsədi daşıyıb.

Səfərin ilk günü qonağa “Xəzər”in Beynəlxalq əlaqələr şöbəsinin əməkdaşları universitetin fəaliyyəti, beynəlxalq əlaqələri, akademik proqramları, tələbə mühiti və strateji inkişaf istiqamətləri barədə ətraflı məlumat verib. Görüş zamanı tərəflər arasında mövcud əməkdaşlıq perspektivləri, tələbə və əməkdaş mobilliyi proqramları, birgə layihələr və beynəlxalq proqramlarda iştirak imkanları ətrafında fikir mübadiləsi aparılib.

Xəzər Universitetinin Beynəlxalq əlaqələr şöbəsinin gündəlik fəaliyyəti ilə yaxından tanış olan qonaq şöbənin tələbə və əməkdaş mübadiləsi, beynəlxalq tərəfdaşlarla koordinasiya, xarici tələbələrin qəbulu prosesi ilə maraqlanib. Bu çərçivədə qarşılıqlı təcrübə paylaşılıb, hər iki universitet üçün faydalı ola biləcək yeni əməkdaşlıq mexanizmləri müzakirə edilib.

2026-cı il aprelin 16-da  universitetin Mərmər zalında Ümid Məmmədovun  tələbə və professor-müəllim heyəti üçün məlumatlandırma sessiyası olub. Sessiya zamanı Rumıniyada ali təhsil sistemi, Rumın-Amerikan Universitetində təhsil imkanları, Erasmus+ proqramının təqdim etdiyi akademik və peşəkar inkişaf fürsətləri, tələbə mübadilə proqramları, müraciət prosedurları və beynəlxalq təhsil təcrübəsinin üstünlükləri barədə ətraflı məlumat verilib.

Mübadilə proqramının son günü qonaq üçün Azərbaycanın zəngin tarixi və mədəni irsini tanıtmaq məqsədilə ölkəmizin məşhur tarixi abidələrindən olan  Atəşgah məbədinə ekskursiya təşkil edilib.

 Səfər  gələcək əməkdaşlıq planlarının müzakirəsi ilə yekunlaşıb.