Xəzər Universitetinin Mövlana Ədəbi-Fəlsəfi Araşdırmalar İnstitutunun koordinatoru Dr. Fəridə Seyidova və Dillər və ədəbiyyatlar departamentinin müəllimi dos. Xatirə Yusifova 2026-cı il aprelin 2-4-də Özbəkistanın paytaxtı Daşkənd şəhərində keçirilən beynəlxalq elmi konfransda  iştirak ediblər.

 Prof. Törə Mirzayevə həsr olunmuş Beynəlxalq Türk Mədəniyyəti simpoziumu  geniş tərkibli təşkilatçı qurumların  əməkdaşlığı ilə ərsəyə gəlib. Simpozium Özbəkistan Respublikası Elmlər Akademiyası, Özbək Dili, Ədəbiyyatı və Folkloru İnstitutu, Əlişir Nəvai adına Dövlət Ədəbiyyat Muzeyi, Əbu Reyhan Biruni adına Şərqşünaslıq İnstitutu, Əlişir Nəvai adına Daşkənd Dövlət Dil və Ədəbiyyat Universiteti, Özbəkistan Yazıçılar Birliyi, Türk Kültürü Araşdırmaları İnstitutu, Ege Universiteti, Azərbaycan Milli Elmlər Akademiyasının Folklor İnstitutu, Ankara Hacı Bayram Vəli Universiteti, Cənubi Koreyanın Dongduk Universitetinin Avrasiya Araşdırmaları İnstitutu, Türk Arxeoloji Mədəni İrs İnstitutu və Beynəlxalq Türk Mədəniyyəti Təşkilatı (TÜRKSOY) tərəfindən birgə təşkil olunub.

Fəridə Seyidova simpozium çərçivəsində “Azərbaycan əsilli Xəlvətiyyə sufi məktəbinin özbək təmsilçisi: Yaqub xan Kaşğari”, Xatirə Yusifova isə “Azərbaycanda XX əsrdə Osmanlı ədəbiyyatı sahəsində elmi tədqiqatların əsas istiqamətləri” mövzularında elmi məruzə ilə çıxış ediblər. Simpozium Türk dünyasının zəngin mədəni irsinin araşdırılması, qorunması və gələcək nəsillərə ötürülməsi baxımından mühüm elmi platforma kimi böyük  əhəmiyyət kəsb edir.