Xəzər Universitetinin Bəşir Səfəroğlu kampusunda yerləşən Fikrət Əmirov Konfrans-Konsert Mərkəzində 2026-cı il mayın 7-də Türk Mühəndislər Dərnəyinin Bakıda keçirilən IV Beynəlxalq Konfransının nümayəndələri üçün konsert proqramı təşkil edildi. Xəzər Universitetinin İctimai Əlaqələr və Media üzrə direktoru Əlövsət Əmirbəyli  Xəzər Universitetinin təsisçisi, Direktorlar və Qəyyumlar Şurasının sədri, Prof.Akad. Hamlet İsaxanlı və universitetin rektoru, Dr. Raziyə İsayevanın adından qonaqları salamladı və universitet haqqında məlumat verdi. Türk Mühəndislər Dərnəyinin Genel Başkanı Yaşar Yekebağcı konsert proqramı üçün “Xəzər”in rəhbərliyinə minnətdarlığını  bildirdi. Y.Yekebağcı konfrans günlərində Türkiye və digər Türk respublikalarından gələn nümayəndələrə göstərilən hər cür dəstəyə və müsafirpərvərliyə görə, Prof.Akad. Hamlet İsaxanlıya, Dr. Raziyə İsayevaya və “Xəzər”in bütün kollektivinə  dərin təşəkkürünü bildirdi.

Türkiye Adalet ve Kalkınma Partiyasının  xarici əlaqələr üzrə Başkan yardımçısı Lavant Ali Yıldız Xəzər Universitetində onlara göstərilən qonaqpərvərliyə, böyük dəstək və yüksək təşkilatçılığa görə, “ Xəzər”  rəhbərliyinə minnətdarlıq etdi.

Konsert proqramında Xəzər Universiteti Musiqi və incəsənət departamentinin müdiri, Əməkdar müəllim  Zülfiyyə Sadıqovanın rəhbərlik etdiyi Kamera Orkestrinin ifasında Üzeyir Hacıbəylinin “ Leyli və Məcnun” operasından “Arazbarı”, “Arşın mal alan”, Həsən Rzayevin “Çahargah rapsodiyası” səsləndirildi. Məhsəti Cabbarovanın ifasında Ü. Hacıbəylinin “ Çırpınırdı qara dəniz” mahnısı alqışlarla qarşılandı.

Müəllim Səbinə İsmayılovanın quruluş verdiyi və tələbələrin ifasında nümayiş etdirilən türk, Azərbaycan, qırğız, özbək, qazax rəqsləri  böyük  marağa səbəb oldu.

Fikrət Əmirov Konfrans-Konsert Mərkəzində keçirilən konsert proqramından türkiyəli qonaqlar xoş təəssüratlarla  ayrıldılar.