Xəzər Universitetinin İqtisadiyyat və menecment departamentinin assistenti, təcrübə koordinatoru və müəllimi Lamiyə Haşımlı Erasmus+ proqramı çərçivəsində 2026-cı il  26 apreldən - 2 maya qədər Türkiyə Respublikasının Gaziantep şəhərində yerləşən Hasan Kalyoncu Universitetində akademik görüşdə olub.

Universitetin Beynəlxalq Ofisi ilə qarşılıqlı əməkdaşlıq perspektivləri, ikitərəfli müqavilələrin inkişafı, təcrübə proqramları və təlim imkanları üzrə müzakirələr aparılıb.

Eyni zamanda, səfər müddətində Lamiyə Haşımlının tələbələr üçün “Təşkilati davranış” və “Karyera planlaması” fənləri üzrə seminarları  təşkil olunub.  Seminarlar çərçivəsində duyğusal zəka, karyera inkişafı və insan həyatında stress, təşkilati davranış kontekstində stress və onunla mübarizə mexanizmləri, ünsiyyət və münasibətlər, eləcə də insan resurslarının idarə edilməsi kimi mövzular əhatə edilib.

Seminarlar interaktiv formatda keçirilib, tələbələrin fəal iştirakı təmin edilib, müasir yanaşmalar əsasında bilik və təcrübə mübadiləsi olub. Tələbələrlə görüşlər zamanı onların akademik və peşəkar inkişaf istiqamətləri üzrə fikir mübadiləsi də aparılıb.

Səfər çərçivəsində keçirilmiş görüşlər və aparılmış müzakirələr hər iki ali təhsil müəssisəsi arasında mövcud əməkdaşlıq əlaqələrinin daha da möhkəmləndirilməsinə, eləcə də gələcək birgə layihələrin həyata keçirilməsi üçün əlverişli zəmin yaradır.