Xəzər Universiteti Təbiət elmləri, sənət və texnologiya yüksək təhsil fakültəsi və Təhsil departamentinin təşkilatçılığı ilə 2026-cı il aprelin 27-də  “Təhsildə tədqiqat metodları: məlumat toplama üsulları” mövzusunda Fatimə Vəliyevanın  elmi-praktik seminarı keçirilib.

O, “2022–2028-ci illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə bağlanmış üçtərəfli müqavilə əsasında Southampton Universitetində “Təhsil” ixtisası üzrə doktorantura təhsili alır.

Seminarın əsas məqsədi tələbələrə tədqiqat prosesinin mərhələləri, məlumat toplama metodları və onların praktik tətbiqi barədə nəzəri və praktiki biliklərin çatdırılması olub.

Seminarda tədqiqat anlayışı, ədəbiyyat icmalı, tədqiqat məqsədinin və suallarının formalaşdırılması, eləcə də məlumatların toplanması mərhələləri ətraflı şəkildə izah edilib.  Xüsusilə, sorğuların hazırlanması, müsahibə növləri (yarı-strukturlaşdırılmış və qrup müsahibələri), həmçinin, fokus qruplar haqqında geniş məlumat verilib.

Seminarın praktik hissəsində iştirakçılar tədqiqat suallarının hazırlanması və müsahibə suallarının qurulması üzərində çalışıblar.