Xəzər Universitetinin nümayəndə heyəti 2026-cı il aprelin 14-də Türkiyənin aparıcı ali təhsil müəssisələrindən olan Yeditepe Universitetində işgüzar görüş keçirib.

Nümayəndə heyətinə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı rəhbərlik edir. “Xəzər”in rektoru Dr. Raziyə İsaeyva, Təbiət elmləri, sənət və texnologiya yüksək təhsil fakültəsinin dekanı Dr. Günel Bahəddinova, eləcə də Təbiət elmləri və mühəndislik fakültəsinin dekanı Dr. Fəxrəndə Əfəndiyeva nümayəndə heyətinə daxildirlər.

Nümayəndə heyəti əvvəlcə Yeditepe Universitetinin rektoru Prof.Dr. Mehmet Durman ilə görüş keçirib. Sonra fakültə əməkdaşları ilə geniş tərkibli müzakirələr aparılıb.

Görüşün sonunda Xəzər Universiteti ilə Yeditepe Universiteti arasında əməkdaşlıq haqqında memorandum imzalanıb.

Akademik əlaqələrin inkişaf etdirilməsi, elmi-tədqiqat sahəsində əməkdaşlıq imkanlarının genişləndirilməsi və gələcək birgə təşəbbüslər ətrafında fikir mübadiləsi olub.

Proqram çərçivəsində nümayəndə heyəti universitetin biotexnologiya laboratoriyasına da baş çəkib.

Laboratoriya ilə tanışlıq zamanı burada həyata keçirilən tədqiqat istiqamətləri, tətbiq olunan müasir texnologiyalar və elmi fəaliyyət barədə ətraflı məlumat verilib. Görüş iştirakçıları gələcəkdə birgə layihələrin reallaşdırılması və əməkdaşlığın daha da dərinləşdirilməsi perspektivlərini də müzakirə ediblər.