Xəzər Universitetinin Təbiət elmləri, sənət və texnologiya yüksək təhsil fakültəsi və Təhsil departamentinin təşkilatçılığı ilə doktorant Fərqanə Seyidlinin 2026-cı il aprelin 20-də “Emosional intellekt və müəllim–uşaq münasibəti: niyə praktikada reallaşdırmaq çətindir?” mövzusunda elmi-praktik seminarı olub.

F.Seyidli “2019-2023-ci illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında İngiltərənin Aberdeen Universitetində “Təhsil”  ixtisası üzrə doktorantura təhsili alır. Onun təqdim etdiyi mövzu emosional intellektin sinif mühitində tətbiqi zamanı yaranan çətinliklərə həsr olunub, təlim zamanı müəllimlərin real situasiyalarda qarşılaşdıqları emosional və kognitiv yüklənmə təsvir edilib.

Uşaqların inkişaf səviyyəsi ilə müəllim gözləntiləri arasındakı uyğunsuzluq da müzakirə olunub. İştirakçılara emosional intellekt bacarıqlarının yalnız nəzəri bilik kimi deyil, həm də  konkret pedaqoji kontekstdə tətbiqinin əhəmiyyəti izah edilib.