2026-cı il  aprelin 21-də Maqsud İbrahimbəyov Yaradıcılıq Mərkəzində “Gedim bir az ağlayım” adlı  romans və poeziya görüşü keçirilib. Görüş çərçivəsində romanslar və vokal əsərlərlə yanaşı, poetik mətnlər də səsləndirilib. Tədbirin təşəbbüskarı görkəmli Azərbaycan bəstəkarı Arif Məlikovun tələbəsi, pianoçu və bəstəkar, Xəzər Universiteti Musiqi və incəsənət departamentinin müəllimi Sevda Rəhimova olub. Proqramda Azərbaycan bəstəkarlarının və müasir müəlliflərin əsərləri yer alıb. Görüş  Ərtoğrul Balayevin ifasında  prelüdlərlə açılıb.

Tədbirin aparıcısı musiqişünas, sənətşünaslıq üzrə fəlsəfə doktoru Aytən Oqtayqızı XəzərUniversitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının “İkimizdən birimiz” şeirindən söz açıb və  şeiri  təhlil edib. Qiraət ustası, şair Xəzər Süleymanlı isə həmin şeiri iştirakçıların diqqətinə çatdırıb.  Müğənnilər Fəridə Məmmədova və İlham Nəzərov musiqisi Sevda Rəhimovaya məxsus “İkimizdən birimiz” adlı duet-romansı ifa ediblər.

Romans və poeziya görüşündə musiqisi Sevda Rəhimovaya, sözləri Leyla Əliyevaya məxsus əsərlər, eləcə də Xəzər Süleymanlının “Susma, danış” ifası və sözləri Gülər Əlvanqızına, musiqisi Aytən Oqtayqızına məxsus “Tanrım” kompozisiyası da  dinləyicilərə təqdim olunub.