Litva Respublikasının Azərbaycan Respublikasındakı səfirliyi ilə əməkdaşlıq çərçivəsində  2026-cı il aprelin 9-da Xəzər Universitetində “Not All of Them: Portraits of War Refugees” (“Onların hamısı deyil: Müharibə qaçqınlarının portretləri”) adlı sərgi təşkil edilib. Tədbir beynəlxalq əməkdaşlığın inkişafı, humanitar dəyərlərin təşviqi və müharibənin insan talelərinə təsirinin ictimaiyyətə çatdırılması baxımından mühüm əhəmiyyət kəsb edib. Sərgidə Litva Respublikasının Baş naziri İnqa Ruqiniene, eyni zamanda Litva Respublikasının Azərbaycan Respublikasındakı fövqəladə və səlahiyyətli səfiri Kestutis Vaşkeleviç və Litva Respublikasının digər dövlət rəsmiləri, həmçinin Ukraynanın Azərbaycan Respublikasındakı fövqəladə və səlahiyyətli səfiri Husyev Yuriy Veniaminoviçin rəhbərliyi ilə səfirliyin nümayəndə heyəti iştirak ediblər.

Sərgidən öncə qonaqlar ilə universitet rəhbərliyi arasında rəsmi görüş keçirilib. Görüşdə Xəzər Universitetindən  Direktorlar və Qəyyumlar Şurasının sədri Prof. Hamlet İsaxanlı, rektor Dr. Raziyə İsayeva və Tədris işləri üzrə prorektor prof. Məhəmməd Nuriyev iştirak edib. Görüş zamanı tərəflər arasında ali təhsil sahəsində mövcud əlaqələr və gələcək əməkdaşlıq perspektivləri barədə fikir mübadiləsi aparılıb. Müzakirələr zamanı Litva ali təhsil müəssisələri ilə Xəzər Universiteti arasında  təhsil və elm sahələrində əməkdaşlığın genişləndirilməsinin vacibliyi vurğulanıb. Akademik mübadilə proqramları, birgə elmi tədqiqatlar və institusional tərəfdaşlıq imkanları əsas müzakirə mövzularından olub.

Tədbirin Mərmər zalda keçirilən rəsmi hissəsində dəvət edilmiş qonaqlar, dövlət rəsmiləri və Xəzər Universitetinin əməkdaşları və tələbələri  iştirak ediblər. Bu geniş iştirak tədbirin akademik ictimaiyyət tərəfindən yüksək maraqla qarşılandığını və universitet daxilində beynəlxalq təşəbbüslərə verilən önəmi bir daha nümayiş etdirib. Açılış mərasimində çıxış edənlər - Prof. Hamlet İsaxanlı, Dr. Raziyə İsayeva, Baş nazir  İnqa Ruqiniene və səfir Husyev Yuriy Veniaminoviç belə təşəbbüslərin yalnız mədəni deyil, eyni zamanda sosial və humanitar baxımdan da mühüm rol oynadığını bildiriblər. Qeyd olunub ki, bu kimi layihələr müxtəlif empatiyanın gücləndirilməsinə, müharibədən zərər çəkmiş insanların səsinin daha geniş auditoriyaya çatdırılmasına və beynəlxalq həmrəyliyin möhkəmlənməsinə töhfə verir.

Sərgidə Litvada sığınacaq tapmış ukraynalı müharibə qaçqınlarının həyat hekayələrini əks etdirən fotoşəkillər təqdim olunub. Ağ-qara formatda nümayiş etdirilən bu əsərlər ziyarətçilərə müharibənin ağır nəticələrini dərindən hiss etdirməklə yanaşı, insan iradəsi, dözümlülük və ümid kimi universal dəyərləri də ön plana çıxarıb. Hər bir fotoşəkil fərdi bir həyat hekayəsini əks etdirərək, müharibənin insan talelərində buraxdığı izləri təsirli şəkildə nümayiş etdirib.Sərgi qonaqlar və tələbələr tərəfindən böyük maraqla qarşılanıb. İştirakçılar təqdim olunan əsərlərlə yaxından tanış olaraq, onların daşıdığı emosional və sosial mesajları yüksək qiymətləndiriblər. Qeyd edək ki, bu cür beynəlxalq tədbirlər Xəzər Universitetinin qlobal əməkdaşlıq şəbəkəsinin genişləndirilməsi, mədəniyyətlərarası dialoqun təşviqi və sosial məsuliyyət təşəbbüslərinə verdiyi önəmin bariz nümunəsidir. Səmimi və konstruktiv şəraitdə keçən görüş tərəflər arasında qarşılıqlı anlaşmanın möhkəmləndirilməsinə xidmət edib və xatirə şəklinin çəkilməsi ilə yekunlaşıb.