Bakı Şəhər Baş Polis İdarəsinin yetkinlik yaşına çatmayanlarla profilaktiki işin təşkili bölməsinin (YYÇPİTB) təşkilatçılığı ilə 2026-ci il aprelin 8-də Qaradağ rayonu Ələt qəsəbəsində yerləşən 127 nömrəli tam orta məktəbdə “Narkomaniyaya yox deyək” mövzusunda maarifləndirici seminar keçirilib.

Seminarda  Xəzər Universitetinin Psixologiya departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov çıxış edərək, maddə asılılığının yaranmasının təkcə fərdi zəifliklə əlaqələndirilməsinin düzgün olmadığını bildirib. Onun sözlərinə görə, bu problem bioloji, psixoloji və sosial amillərin qarşılıqlı təsiri nəticəsində formalaşır. Xüsusilə, uşaqlıqda yaşanan travmalar, valideyn nəzarətinin zəif olması, ailədaxili gərginlik və emosional diqqətsizlik gələcəkdə asılılıq riskini artıran əsas səbəblər sırasındadır. Eyni zamanda, aşağı özünəqiymət, depressiya, təşviş və streslə mübarizə bacarıqlarının yetərsizliyi də asılılığın yaranmasına təsir edən  psixoloji faktorlar kimi qeyd olunub. Psixoloq vurğulayıb ki, bu problemin qarşısını almaq üçün erkən diaqnostika, psixoloji dəstək proqramlarının təşkili, valideynlərin maarifləndirilməsi və təhsil müəssisələrində profilaktik tədbirlərin gücləndirilməsi vacibdir. Bundan əlavə, sağlam sosial mühitin formalaşdırılması və gənclərə streslə düzgün mübarizə üsullarının öyrədilməsi də önəmli profilaktik addımlar hesab olunur.

Tədbirdə Bakı Şəhər Baş Polis İdarəsinin yetkinlik yaşına çatmayanlarla profilaktiki işin təşkili bölməsinin rəisi, polis polkovniki İbrahim İsmayılov, həmin bölmənin inspektorları polis mayoru Afaq Əliyeva və polis baş leytenantı Aysel Hacıyeva iştirak ediblər.