Qazaxıstanın Almatı şəhərində yerləşən Əl-Fərabi adına Qazax Milli Universitetində 2026-cı il aprelin 6-8-də  “Study in Azerbaijan” adlı təhsil sərgisi təşkil olunur. Sərgi Azərbaycan universitetlərinin beynəlxalq tanıdılması, təhsil imkanlarının təqdimatı və akademik əməkdaşlığın genişləndirilməsi baxımından mühüm platforma hesab olunur.

Sərgi çərçivəsində aprelin 6-da Qazaxıstan və Azərbaycan universitetlərinin rektorlarının II Forumu keçirilib. Forumun açılışında Qazaxıstanın elm və ali təhsil naziri  Sayasat Nurbek çıxış edib.

Sonra  hər iki ölkənin elm və təhsil nazirləri tərəfindən əsas məruzələr təqdim edilib, iki ölkə universitetləri arasında əməkdaşlıq memorandumları mərasimi olub.

Tədbirdə Xəzər Universiteti Qazaxıstanın iki universiteti (Astana Beynəlxalq Universiteti və Abylkas Saginov Karaganda Texniki Universiteti) ilə əməkdaşlıq memorandumları (MOU) imzalayıb.

Forum və sərgidə Xəzər Universitetinin nümayəndə heyəti də iştirak edir. Xəzər Universitetini rektor Dr. Raziyə İsayeva, Keyfiyyət Təminatı Mərkəzinin direktoru Lyudmila Sotova və Beynəlxalq əlaqələr şöbəsinin müdiri Firuz Süleymanov təmsil edir.

Forum çərçivəsində Azərbaycan və Qazaxıstan universitetlərinin rektorları çıxış edərək, təhsil sahəsində əməkdaşlıq perspektivlərini müzakirə ediblər. Bu müzakirələr iki ölkə arasında akademik əlaqələrin daha da möhkəmlənməsinə yönəlib.

Səfər çərçivəsində Raziyə  İsayeva yerli televiziya kanalına verdiyi müsahibədə təhsil sərgisində iştirakın məqsədi, universitetin ali təhsil imkanları, əcnəbi  tələbələr üçün yaradılan şərait və Xəzər Universitetinin Qazaxıstan universitetləri ilə ikili diplom proqramları, tələbə və akademik heyət mübadiləsi, birgə elmi tədqiqatlar və digər akademik əməkdaşlıq istiqamətlərində də maraqlı olduğunu vurğulayıb.

Qeyd edək ki, “Study in Azerbaijan” sərgisi tələbələrə və gənc mütəxəssislərə xaricdə keyfiyyətli təhsil almaq imkanlarını təqdim etməklə yanaşı, region ölkələri arasında elmi və akademik əməkdaşlığın inkişafına mühüm töhfə verir.