Xəzər Universiteti Psixologiya departamentinin əməkdaşı, psixoloq Mirsadiq Muxtarov 2026-cı il martın 30-da “Tehsil365” xəbər saytına müsahibə verib. Psixoloq Azərbaycan cəmiyyətində psixoloji yardıma münasibət, mövcud stereotiplər və onların aradan qaldırılması yolları barədə fikirlərini bölüşüb.

Psixoloq qeyd edib ki, cəmiyyətdə psixoloji yardım almağa qarşı formalaşmış stereotiplər tarixi, mədəni və sosial faktorlarla bağlıdır. Bu stereotiplərin dəyişməsi üçün maarifləndirmə mühüm rol oynayır. Psixoloqa yalnız ciddi psixi problemləri olan insanların müraciət etdiyi barədə yanlış düşüncələr hələ də mövcuddur və bu yanaşmanın dəyişdirilməsi vacibdir. M. Muxtarov vurğulayıb ki, psixoloji xidmətlərin mahiyyəti televiziya proqramları, sosial media platformaları, eləcə də müxtəlif müəssisə və təhsil ocaqlarında keçilən seminarlar vasitəsilə daha geniş şəkildə izah edilməlidir. Psixoloqa müraciətin normal və təbii bir addım kimi qəbul olunması cəmiyyətin psixoloji sağlamlığı baxımından əhəmiyyətlidir.

Psixoloq, həmçinin, psixoloji xidmətlərin əlçatanlığının artırılmasının vacibliyini qeyd edib. Onun sözlərinə görə, regionlarda mütəxəssislərin azlığı və xidmətlərin bəzən yüksək qiyməti bu sahəyə müraciəti məhdudlaşdırır. Bu baxımdan dövlət səviyyəsində məktəblərdə, universitetlərdə və tibb müəssisələrində psixoloji xidmətlərin gücləndirilməsi mühüm əhəmiyyət daşıyır.

M. Muxtarov bildirib ki, psixoloji dəstək almaq zəiflik deyil, əksinə, insanın özünü inkişaf etdirməsinə və həyat keyfiyyətinin yüksəldilməsinə xidmət edir. Psixoloji savadlılığın artırılması üçün təhsil sistemində də müvafiq addımlar atılmalıdır. Onun fikrincə, məktəblərdə emosional zəka və stressin idarə olunması kimi mövzuların tədrisi, həmçinin valideynlər üçün maarifləndirici proqramların təşkili bu istiqamətdə mühüm rol oynayır.

https://tehsil365.news/az/news/57334/