2026-cı il aprelin 13-16-da Xəzər Universitetinin nümayəndə heyəti Türkiyənin bir sıra aparıcı ali təhsil müəssisələrində - Sabancı Universiteti, Yeditepe Universiteti, İstanbul Texniki Universiteti, Boğaziçi Universiteti və Koç Universitetində işgüzar görüşlər keçirib. Əsas məqsəd akademik əməkdaşlığın genişləndirilməsi, birgə elmi-tədqiqat layihələrinin inkişafı, tələbə və müəllim mübadiləsinin təşviqi və beynəlxalq tərəfdaşlıq əlaqələrinin möhkəmləndirilməsi olub.

Səfər aprelin 13- də Sabancı Universitetində görüşlə başlayıb. Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının rəhbərlik etdiyi nümayəndə heyətinə universitetin rektoru Dr. Raziyə İsayeva, Təbiət elmləri, sənət və texnologiya yüksək təhsil fakültəsinin dekanı Dr. Günel Bahəddinova və Təbiət elmləri və mühəndislik fakültəsinin dekanı Dr. Fəxrəndə Əfəndiyeva daxil idi. Sabancı Universitetinin rəhbərliyi ilə keçirilən görüşlərdə akademik əməkdaşlıq, tələbə-müəllim mübadiləsi, eləcə də birgə tədqiqat və innovasiya layihələri müzakirə edilib. Nümayəndə heyəti, həmçinin, universitetin aparıcı tədqiqat laboratoriyaları ilə tanış olub və burada aparılan elmi fəaliyyətlər barədə məlumat alıb.

 Aprelin 14-də nümayəndə heyəti Yeditepe Universitetində olub. Rektor Prof. Mehmet Durman ilə keçirilən görüşdən sonra tərəflər arasında əməkdaşlıq memorandumu imzalanıb. Görüşlərdə akademik əlaqələrin inkişafı, ikili diplom proqramlarının yaradılması və elmi-tədqiqat əməkdaşlığının genişləndirilməsi məsələləri müzakirə edilib. Proqram çərçivəsində biotexnologiya laboratoriyasına da baş çəkilib.

Aprelin 15-də  isə nümayəndə heyəti İstanbul Texniki Universiteti və Boğaziçi Universitetində olub. İstanbul Texniki Universitetində keçirilən görüşlərdə bakalavr, magistr və doktorantura səviyyələrində ikili diplom proqramlarının yaradılması, elmi əməkdaşlığın gücləndirilməsi və birgə tədqiqat imkanları müzakirə edilib. Kompüter və informatika mühəndisliyi fakültəsinin laboratoriyalarına da baş çəkilib. Həmin gün Boğaziçi Universitetində keçirilən görüşlərdə isə Data Elmləri və Süni İntellekt İnstitutu, eləcə də Beynəlxalq Əlaqələr Ofisinin nümayəndələri ilə akademik əməkdaşlıq perspektivləri ətrafında fikir mübadiləsi aparılıb.

Səfərin son günü - aprelin 16-da “Xəzər”in nümayəndə heyəti Koç Universitetində olub. Burada keçirilən görüşlərdə beynəlmiləlləşmə, elmi-tədqiqat əməkdaşlığı və birgə proqramların inkişafı məsələləri müzakirə edilib. Görüşlərdə iştirak edən  universitetin müxtəlif fakültə və beynəlxalq əlaqələr strukturunun nümayəndələri əməkdaşlıq istiqamətləri barədə fikir mübadiləsi aparıblar.

Səfər çərçivəsində aparılan müzakirələr və imzalanan razılaşmalar Xəzər Universiteti ilə Türkiyənin aparıcı universitetləri arasında akademik əlaqələrin daha da gücləndirilməsi, yeni birgə layihələrin həyata keçirilməsi və beynəlxalq elmi əməkdaşlığın genişləndirilməsi baxımından mühüm nəticələr əldə edildiyini göstərir.