Xəzər Universiteti  Təbiət elmləri, sənət və texnologiya yüksək təhsil fakültəsi və Həyat elmləri departamentinin təşkilatçılığı ilə doktorant Kübra İbrahimovanın 2026-cı il aprelin 27-də “Ağır metal çirklənməsinə qarşı Azolla: brassinosteroid və GA₃ ilə fitoremediasiyanın gücləndirilməsi” mövzusunda seminarı keçirilib.

Məruzəçi “2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə xaricdə doktorantura təhsili” proqramı çərçivəsində Azərbaycan Respublikasının Təhsil Nazirliyi və Xəzər Universiteti ilə bağlanmış üçtərəfli müqavilə əsasında Türkiyənin İstanbul Universitetində botanika ixtisası üzrə təhsil alır.

Seminar zamanı Azolla bitkisində kadmium (Cd) stressi şəraitində brassinosteroidlər (BR) və gibberellinlər (GA₃) hormonlarının fitoremediasiya prosesinə təsiri araşdırılıb. Təqdim olunan nəticələr göstərmişdir ki, Cd stressinə məruz qalan bitkilərdə BR və GA₃ tətbiqi antioksidant müdafiə sisteminin — xüsusilə, SOD və POD fermentlərinin — aktivliyini tənzimləyərək oksidativ zədələnməni azaldır.

Bununla yanaşı, hormonların tətbiqi bitkinin böyümə göstəricilərini yaxşılaşdırır və kadmiumun toplanma qabiliyyətini artıraraq, fitoremediasiyanın effektivliyini yüksəldir. Xüsusilə, BR və GA₃-ün kombinə olunmuş tətbiqi sinergetik təsir göstərərək bitkinin stressə qarşı tolerantlığını əhəmiyyətli dərəcədə artırır.