Xəzər Universiteti Təbiət elmləri, sənət və texnologiya yüksək təhsil fakültəsi və Neft mühəndisliyi departamentinin təşkilatçılığı ilə doktorant Mürsəl Zeynallının 2026-cı il mayın 8-də “Neftvermə əmsalının artırılması” mövzusunda seminarı olub.

M. Zeynallı “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında Birləşmiş Ərəb Əmirliklərinin Xəlifə Universitetində (Khalifa University) “Neft-qaz mühəndisliyi” ixtisası üzrə doktorantura təhsili alır.

Seminar zamanı ilkin və ikincili neftçıxarma mərhələlərindən sonra tətbiq olunan EOR texnologiyalarının əhəmiyyəti izah edilib, suvurmanın səmərəliliyi, neftvermə əmsalı, hərəkətlilik nisbəti, qalıq və kənarda qalmış neft anlayışları ətraflı şəkildə müzakirə olunub.  Təqdimatda termal EOR, qaz vurulması, həmçinin, polimer, səthi-aktiv maddə, qələvi, SP, ASP və köpük əsaslı kimyəvi EOR üsulları haqqında sistemli məlumat verilib. Xüsusilə, bu metodların layda süpürmə və yerdəyişmə səmərəliliyini artırmaq, qalıq neft miqdarını azaltmaq və mövcud yataqların daha səmərəli işlənməsini təmin etmək baxımından rolu vurğulanıb.  Seminar tələbələrə neft-qaz mühəndisliyi üzrə nəzəri bilikləri real neft yataq tətbiqləri və müasir tədqiqat istiqamətləri ilə əlaqələndirmək imkanı yaradıb.