2026-cı il aprelin 24-25-də Xəzər Universitetində Azərbaycan X Beynəlxalq Psixologiya Konfransı olub. Universitetin Psixologiya departamentinin təşkilatçılığı ilə keçirilən tədbir psixologiya sahəsində yerli və xarici alimləri, tədqiqatçıları və mütəxəssisləri bir araya gətirib. Konfransın məqsədi beynəlxalq elmi əməkdaşlığı gücləndirmək, innovativ yanaşmaları təşviq etmək və psixologiya sahəsində bilik mübadiləsini genişləndirmək idi. Tədbir, eyni zamanda, Azərbaycanda psixologiya elminin və praktikasının inkişafına töhfə verməyə yönəlmişdi.

İki gün davam edən konfrans çərçivəsində müxtəlif ölkələrdən dəvət olunmuş ekspertlərin iştirakı ilə elmi məruzələr, panel müzakirələr, həmçinin, praktiki workshop və təlimlər təşkil olunub. Tədbirin ilk günündə iştirakçılar psixologiyanın aktual problemləri, müasir yanaşmalar və yeni tədqiqat istiqamətləri ətrafında fikir mübadiləsi aparıblar.

Açılış mərasimində Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı çıxış edərək, tədbirin əhəmiyyətindən danışıb. Universitetin rektoru Dr. Raziyə  İsayeva açılış nitqi ilə iştirakçıları salamlayıb. Konfransın ilk günü ərzində Sultanberk Halmatov “Neyropedaqogika”, Nevin Dölek “Kriz vəziyyətlərində davamlılıq prinsipi”, Selçuk Aslan “Şəfqət yönümlü terapiya”, eləcə də Elxan Yusifov “Neyroinkişafi xəstəliklərin tədqiqatı və diaqnostikasında müasir istiqamətlər” mövzularında məruzələrlə çıxış ediblər. Günün ikinci yarısında Külteğin Ögel və Metin Başoğlu tərəfindən asılılıq və travma yönümlü terapiya metodlarına dair təqdimatlar keçirilib. Gün Tahir Özakkaşın emosiya əsaslı terapiya mövzusunda onlayn çıxışı ilə yekunlaşıb.

Konfransın ikinci günü çərçivəsində Sultanberk Halmatovun “Sənət terapiyası atelyesi”, Nevin Dölekin “Krizlə mübarizə üçün dəstək fəaliyyətləri”, Külteğin Ögelin “Asılılıqla işləmək: klinik reallıqlar və psixoterapiya strategiyalarının praktik tətbiqi”, eləcə də Selçuk Aslanın “Şəfqət yönümlü terapiyanın tətbiqləri” mövzularında sessiyaları keçirilib. Günün sonunda konfransın yekunu olub və iştirakçılara sertifikatlar təqdim edilib.

Konfrans ərzində müxtəlif istiqamətlər üzrə mütəxəssislər arasında fənlərarası əməkdaşlığın genişlənməsinə imkan yaranıb. Tədbir iştirakçıları konfransın yeni ideyaların formalaşmasına və beynəlxalq əlaqələrin möhkəmlənməsinə mühüm töhfə verdiyini bildiriblər.