Xəzər Universitetinin Mərmər zalında 2026-cı il aprelin 2- də universitetin təmir, tikinti işləri üzrə meneceri Şahin İsayevin 60 illik yubileyinə həsr olunmuş “Ömür yolu yol deyil ki...” adlı  tədbir keçirilib. Tədbir Musiqi və incəsənət departamentinin müdiri, Əməkdar müəllim Zülfiyyə Sadıqovanın pianoda  müşayiətilə solist Nurlan Gəncəlinin ifasında Xalq artisti Fikrət Əmirovun “Məhəbbət rəqsi” əsəri ilə başlanıb. Sonra Şahin İsayevin ömür yoluna aid foto- video materiallar təqdim olunub.  

Xəzər Universitetinin təsisçisi, Direktorlar və Qəyyumlar Şurasının sədri  Prof.Akad. Hamlet İsaxanlı Şahin İsayev haqqında xatirələrini danışıb. Bildirib ki, biz qardaşların yaşca ən kiçiyi Şahin olmasına baxmayaraq, elə uşaqlıq illərindən xarakteri, fəhmi, çalışqanlığı ilə seçilib, şahmata, futbola, ümumilikdə, idmana bağlılığı gələcək həyatında mühüm rol oynayıb. H. İsaxanlı Şahin İsayevin gənclik və tələbəlik illərindən də söz açaraq, onun Xəzər Universiteti ilə bağlılığını, bir mühəndis kimi universitetin inkişafındakı xidmətlərini, bu yolda əzmlə çalışdığını xüsusi qeyd edib. Yubileyi münasibətilə Ş. İsayevə xoş arzularını bildirən H. İsaxanlı bundan sonra da onun  uğurlarına əmin olduğunu deyib.

Xəzər Universitetinin rektoru Dr. Raziyə İsayeva Şahin İsayevin yüksək insani keyfiyyətlərindən, səmimiyyətilə universitet kollektivinin rəğbətini qazanmasından söz açaraq, bildirib ki, bu amillər uğurların qazanılmasında mühüm rol oynayır. Dr. R. İsayeva qeyd edib ki, universitetin kampuslarının tikintisində, eləcə də digər mühüm işlərdə  Şahin İsayevin böyük əməyi var.

Xəzər Universitetinin akademik işlər üzrə prorektoru Prof. Məhəmməd Nuriyev, universitet əməkdaşlarından Əlövsət Əmirbəyli, Piri Piriyev Ş. İsayevlə bağlı xatirələrini danışıb, xoş arzularını bildiriblər.

Musiqi və incəsənət departamentinin müəllimləri aşıq Ramin Qarayev,  Məhsəti Cabbarova və rəqqasə Tahirə Bayramova təbriklərini öz ifaları ilə çatdırıblar.

Şahin İsayev 60 illik yubileyi münasibətilə keçirilən tədbirin təşkilatçılarına təşəkkür edib, bundan sonra da universitetin uğurları naminə əzmlə çalışacağını bildirib.

Tədbirin sonunda Prof.Akad. H. İsaxanlı və Dr. R. İsayeva Şahin İsayevə xatirə hədiyyələri təqdim ediblər.