Xəzər Universitetinin Təbiət elmləri və mühəndislik fakültəsinin I kurs tələbələri Tarix və arxeologiya departamentinin müəllimləri Dr. Yaqub Məmmədov və Samirə Hadiyevanın rəhbərliyi ilə 2026-cı il mayın 3-də Qobustan Dövlət Tarixi-Bədii Qoruğunda ekskursiyada olublar.

Ekskursiya zamanı tələbələrə Qobustanın arxeoloji baxımdan öyrənilmə tarixi, burada aparılmış tədqiqatların nəticələri və muzeydə saxlanılan zəngin arxeoloji materiallar haqqında ətraflı məlumat verilib.  Müəllimlər həmçinin, tələbələri qoruğun unikal abidələri ilə tanış edib, onların elmi və mədəni əhəmiyyətindən danışıblar.

Tələbələr qayalar üzərində yüzlərlə piktoqrafik təsvirlərə baxıb, bu təsvirlərin çəkilmə texnikası, simvolik məzmunu və dünya miqyasında analoji nümunələr arasında yeri barədə müzakirə aparıblar. Bu müzakirələr tələbələrin nəzəri biliklərinin praktik müşahidələrlə möhkəmlənməsinə, həmçinin, arxeoloji irsin qorunması və öyrənilməsinin vacibliyini daha dərindən dərk etmələrinə zəmin yaradır.

Muzey və qoruqlara təşkil olunan bu cür ekskursiyalar tələbələrin elmi dünyagörüşünün formalaşmasında da  mühüm rol oynayır. Onlar nəzəri dərslərdə öyrəndikləri bilikləri real tarixi abidələr üzərində tətbiq etmək imkanı qazanır, həmçinin, milli-mədəni irsə bağlılıqları artır. Xəzər Universitetində bu ənənə sistemli  şəkildə davam etdirilir və tələbələrin elmi hazırlığının ayrılmaz hissəsi kimi nəzərdə tutulur.