“2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə bağlanmış üçtərəfli müqavilə əsasında Almaniyanın Berlin Texniki Universitetində təhsil alan doktorant Günay Kazımzadənin iştirakı ilə 2026-cı il martın 11-də seminar təşkil olunub. Xəzər Universitetinin Təbiət elmləri, sənət və texnologiya yüksək təhsil fakültəsi və Kompüter elmləri departamentinin təşkilatçılığı ilə keçirilən seminar “Məlumat annotasiyasının gizli təsir mexanizmlərinin aşkarlanması: etik süni intellekt üçün çoxsəviyyəli çərçivə” mövzusuna həsr edilib.

Seminar zamanı süni intellekt sistemlərində qərəzin modelin təlim mərhələsindən əvvəl, xüsusilə, xam məlumatların insan annotatorları tərəfindən etiketlənməsi prosesində necə formalaşdığı barədə məlumat verilib. Qeyd olunub ki, məlumatların etiketlənməsi zamanı annotatorların fərdi qərarları, təşkilati iş qaydaları və bazar təzyiqləri qərəzin yaranmasına və sonradan süni intellekt modellərinə ötürülməsinə təsir göstərə bilər.

Çıxışda tədqiqatın mikro, mezo və makro səviyyələr üzrə aparıldığı qeyd olunub. Mikro səviyyədə annotatorların qərarlarına təsir edən psixoloji amillər, mezo səviyyədə təşkilati qaydalar və iş şəraiti, makro səviyyədə isə bazar təzyiqləri və autsorsinq proseslərinin etik riskləri müzakirə olunub.

Seminar çərçivəsində, həmçinin, süni intellekt sistemlərində qərəzin azaldılması üçün fairness (ədalət) yönümlü alətlərin tətbiqi, etik süni intellekt yanaşmaları və məlumatların daha şəffaf və məsuliyyətli idarə olunması istiqamətində təkliflər səsləndirilib.