Xəzər Universitetinin  Dillər və ədəbiyyatlar departamentinin inteqrativ dərs layihəsi çərçivəsində 2026-cı il martın 12- də  onlayn seminar təşkil olunub. Departamentin müəllimi Maral Əskərovanın təşkilatçılığı ilə keçirilən  seminar  “Türk dünyası mədəniyyəti” kursunun “Bozqır mədəniyyəti və onun təşəkkülü” mövzusuna həsr edilib.

Seminarın qonaq mütəxəssisi, türk ləhcələri və ədəbiyyatları (Qıpçaq dilləri) və türk kültürü sahəsində sanballı araşdırmalar aparmış Türkiyənin Afyon Kocatepe Universitesinin  professoru Cüneyt Akın olub. O, uzun illər Qırğızıstanda fəaliyyət göstərib, qırğız dilinin dialektləri və söz varlığı üzərində fundamental tədqiqatları ilə tanınıb.  Son illərdə isə  Cüneyt Akının türk kültürü, türk siyasəti, türk dövlət quruculuğunda adət-ənənə kimi, mövzulardakı araşdırmaları diqqət çəkməkdədir. Onun “Türk Devletleri Teşkilatının Türk Birliğine Dönüşme İmkânı” adlı kitabı sahə üzrə dərin fəaliyyətinin göstəricisidir.

İnteraktiv formatda keçən dərsdə tələbələrə “Avrasiya bozqırlarının coğrafi və ekoloji konteksti”,  ”Proto-türk toplumlarının arxeoloji izləri” (e.ə. III–I minilliklər), “Köçəri həyat tərzinin sosial-iqtisadi əsasları”,  “Hun və Göytürk dövlətçilik ənənəsi, Orxon kitabələri”, ”Maddi mədəniyyət, atçılıq və metallurgiya texnologiyaları istiqamətləri”  üzrə geniş məlumat verilib.

Professor  Cüneyt  Akının  öz  təqdimatını Azərbaycan dilində etməsi və materiallarını  tələbələr üçün məhz bu dildə hazırlaması iştirakçılar tərəfindən böyük rəğbətlə qarşılanıb.

Seminarın sonunda mütəxəssis yaradılan şəraitə görə,  universitet rəhbərliyinə öz təşəkkürünü bildirib.