Xəzər  Universitetində  2026-cı il  martın 13-də  robototexnika və avtomatlaşdırma mühəndisi, TU Dortmund Universitetində tədqiqatçı,”Mühəndislikdə qadınlar—Azərbaycan” layihəsinin (“IEEE Women in Engineering Azerbaijan”) rəhbəri Sonabəyim Hüseynzadənin  “Robototexnika, Etika və Qlobal  Liderlik” mövzusunda seminarı keçirilib.

Xəzər Universitetinin professor-müəllim heyəti və tələbələrinin  iştirak etdiyi seminarda  robotların artıq yalnız sənayedə deyil, xəstəxanalar, yaşlılara qulluq mərkəzləri və ictimai məkanlarda da  istifadə olunmasının yaratdığı etik və sosial məsələlərdən danışılıb və   interaktiv müzakirələr aparılıb. Yaponiyanın Sendai şəhərində yaşlı insanlarla və humanoid robotlarla aparılan tədqiqatlara əsaslanaraq, insan-robot qarşılıqlı əlaqəsinin xüsusiyyətləri, robotların emosional və mədəni siqnallara uyğun davranışının insanların etibarına təsiri barədə ətraflı məlumat verilib.

Sosial robotların inkişafı ilə bağlı etik qaydalar, mövcud idarəetmə boşluqları və bu texnologiyaların məsuliyyətli şəkildə tətbiqi üçün zəruri olan texniki və institusional yanaşmalar da  iştirakçıların diqqətinə çatdırılıb.  Seminar çərçivəsində iştirakçıların sualları cavablandırılıb.