Latviya Həyat Elmləri və Texnologiyaları Universitetinin Beynəlxalq Əməkdaşlıq Mərkəzinin rəhbəri Martin Saboviç 2026-cı il martın 11-də  Xəzər Universitetində olub. “Xəzər”in  Beynəlxalq əlaqələr şöbəsi  əməkdaşlarının iştirakı ilə keçirilən görüşdə universitetlər arasında mövcud və potensial əməkdaşlıq imkanları  müzakirə edilib.

Tərəflər akademik mübadilə proqramları, xüsusilə, Erasmus+ çərçivəsində tələbə və müəllim mübadiləsinin genişləndirilməsi, iki universitet arasında anlaşma memorandumunun (MoU) imzalanması, eləcə də bakalavr səviyyəsində bir sıra ixtisaslar üzrə ikili diplom proqramlarının yaradılması və gələcəkdə birgə beynəlxalq layihələrin hazırlanması imkanları barədə fikir mübadiləsi aparıblar.

Görüş çərçivəsində Xəzər Universitetinin tanıtım təqdimatı nümayiş etdirilib, universitetin təhsil proqramları, beynəlxalq əməkdaşlıq fəaliyyəti, elmi-tədqiqat istiqamətləri və infrastrukturu barədə ətraflı məlumat verilib. Qonaq isə Latviya Həyat Elmləri və Texnologiyaları Universitetinin fakültələri və akademik imkanları haqqında məlumat verib. Bildirilib ki, həmin  universitetdə  də  “Xəzər”də  olduğu kimi, bir sıra ortaq istiqamətlər üzrə fakültələr fəaliyyət göstərir. Baytarlıq təbabəti (Veterinary Medicine) sahəsində ixtisaslaşmış fakültə mövcuddur. Qonaq qeyd  edib ki, tələbələrin praktiki bacarıqlarının inkişafı üçün universitetin nəzdində onların təhsil müddətində istifadə edə biləcəkləri klinika mövcuddur və tələbələr burada təcrübə  keçmək imkanı əldə edirlər.

Görüşdən sonra Martin Saboviç Xəzər Universitetinin laboratoriyalarına baş çəkib, burada aparılan elmi-tədqiqat işləri və mövcud laboratoriya infrastrukturu ilə tanış olub.