Xəzər Universitetinin Karyera və Məzunlar Mərkəzinin təşkilatçılığı ilə 2026-cı il martın 11-də Azərbaycan Yerüstü Nəqliyyat Agentliyi (AYNA) əməkdaşları tərəfindən “Mikromobillik və Velosiped Təlimi” mövzusunda maarifləndirici tədbir keçirildi.

Təlimin açılışında Karyera və Məzunlar Mərkəzinin direktoru Zərifə Əliyeva mərkəzin missiyası, fəaliyyəti və tələbələrin peşəkar inkişafına dəstək məqsədilə həyata keçirilən layihələr barədə qısa məlumat verdi. O, tələbələrin əmək bazarına uğurlu inteqrasiyasını təmin etmək üçün təqdim olunan karyera xidmətləri və mövcud imkanlardan söz açdı.

Təlimdə tələbələrə müasir şəhər mobilliyinin vacib istiqamətlərindən biri hesab olunan mikromobillik haqqında geniş məlumat verildi. Bildirildi ki, son illərdə şəhərlərdə nəqliyyatın daha rahat və ekoloji baxımdan səmərəli təşkili üçün yeni yanaşmalar tətbiq olunur. Bu yanaşmaların əsas istiqamətlərindən biri mikromobillikdir. Yəni, qısa məsafələr üçün fərdi və yüngül nəqliyyat vasitələrindən – velosipedlərdən, elektrik skuterlərindən və oxşar vasitələrdən istifadə nəzərdə tutulur. Bu nəqliyyat vasitələri xüsusilə böyük şəhərlərdə həm vaxt itkisini azaltmağa, həm də ekoloji mühitin qorunmasına .yardım göstərir.

Təqdimat zamanı şəhər mikromobillik xidmətlərindən biri olan APAR haqqında də məlumat verildi. APAR velosiped və skuterlərin icarəsini innovativ şəkildə təşkil edən mikromobillik xidmətidir. Xidmətin əsas məqsədi bu nəqliyyat vasitələrini yalnız əyləncə məqsədilə deyil, həm də şəhər daxilində gündəlik hərəkətin bir hissəsinə çevirmək və istifadəçilərə ekoloji təmiz alternativ nəqliyyat imkanı yaratmaqdır. Bu mobil tətbiqi vasitəsilə istifadəçilər velosiped və skuterləri asanlıqla icarəyə götürə bilirlər.

Görüşdə agentliyin nümayəndələri – Kommunikasiya departamentinin böyük mütəxəssisi Ruhlan Əbülfəzzadə və APAR-ın İnnovasiyalar və marketinq şöbəsinin rəhbəri Fatimə Göycəli ölkədə yerüstü nəqliyyatın inkişafı, ictimai nəqliyyatın səmərəliliyinin artırılması və alternativ nəqliyyat vasitələrinin təşviqi istiqamətində həyata keçirilən layihələr haqqında da məlumat verdilər.

Təlim zamanı iştirakçılara mikromobillik vasitələrindən istifadə edərkən təhlükəsizlik qaydalarına riayət etməyin vacibliyi, qoruyucu vasitələrin istifadəsi və yol hərəkəti qaydalarına əməl olunması barədə praktiki tövsiyələr verildi. Sonra tələbələr velosiped sürmə üzrə praktiki məşğələdə iştirak edərək, təhlükəsiz  bacarıqlarını sınaqdan keçirdilər.

Belə maarifləndirici təşəbbüslər gənclər arasında təhlükəsiz nəqliyyat mədəniyyətinin formalaşmasına, mikromobillik vasitələrindən düzgün istifadənin təşviqinə və şəhər mühitində daha dayanıqlı mobillik vərdişlərinin inkişafına xidmət edir.