Xəzər Universitetinin rektoru Dr. Raziyə  İsayeva və Elmi işlər üzrə prorektoru Dr. Ülkər İsayeva  2026-cı  il martın 2-5-də  Çin Xalq Respublikasına işgüzar səfər ediblər. Səfərin məqsədi aparıcı Çin universitetləri və elmi-tədqiqat mərkəzləri ilə akademik əməkdaşlıq imkanlarını genişləndirmək və birgə tədqiqat layihələri üzrə tərəfdaşlığı inkişaf etdirmək olub.

Səfər çərçivəsində nümayəndə heyəti Şanxay Jiaotong Universiteti, Şanxay Xarici Dillər Universiteti və Fudan Universitetində bir sıra görüşlər keçirib. Görüşlərdə universitetlər arasında strateji tərəfdaşlığın inkişafı, birgə tədris proqramları, tədqiqat və innovasiya sahələrində əməkdaşlıq imkanları müzakirə olunub. Nümayəndə heyəti, həmçinin,  Jiaotong Universitetinin Kompüter elmləri və mühəndislik fakültəsi, Süni Ümumi Zəka İnstitutu, Fudan Universitetinin Fudan Çjantszyan (Zhangjiang) Tədqiqat İnstitutu, Beyin əsaslı Zəka üzrə Elm və Texnologiya İnstitutu və Materialşünaslıq departamentində olub.  

Nümayəndə heyəti Fudan Universitetinin Çjantszyan (Zhangjiang) Yüksək texnologiyalar parkına baş çəkib  və Çjantszyan (Zhangjiang) Yüksək texnologiyalı inteqral sxemlər və Biotibbi parkın (Zhangjiang Hi-Tech Integrated Circuit and Biomedical Park) fəaliyyəti ilə tanış olub. Heyətin Çjantszyan Beynəlxalq Beyin Görüntüləməsi Mərkəzində (Zhangjiang International Brain Imaging Centre) və Qlobal Süni İntellekt İnnovativ İdarəetmə Mərkəzində də (Center for Global AI Innovative Governance) görüşləri olub. Keçirilən dəyirmi masada neyroelm və süni intellekt sahələrində birgə tədqiqat və tədris əməkdaşlığı məsələləri müzakirə edilib və əməkdaşlığa dair razılığa gəlinib.

Səfər çərçivəsində nümayəndə heyəti Jiatong Universiteti Tibb fakültəsi ilə də görüş keçirərək, fakültənin fəaliyyəti, tədqiqat imkanları və laboratoriyaları ilə tanış olub. Görüşdə tələbə mübadiləsi, birgə tədqiqat layihələri və təqaüd proqramları kimi əməkdaşlıq imkanları müzakirə edilib.

Xəzər Universiteti nümayəndə heyətinin Çinə səfəri universitetin beynəlxalq əməkdaşlıq strategiyasının genişləndirilməsi və Asiyanın aparıcı universitetləri ilə akademik əlaqələrin gücləndirilməsi baxımından mühüm əhəmiyyət daşıyır.