Xəzər Universiteti  Psixologiya  departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov 2026-cı il martın 6-da  “Tehsil365” xəbər saytına müsahibə verib. Psixoloq uşaqlıq travmalarının insanın gələcək münasibətləri, özünəinamsızlığı və psixoloji vəziyyətinə təsiri mövzusunda fikirlərini bölüşüb.

Psixoloq qeyd edib  ki, uşaqlıq travmaları yalnız fiziki zorakılıqla məhdudlaşmır, eyni zamanda, emosional laqeydlik, ailədaxili gərginlik, valideyn itkisi və sevgi çatışmazlığı kimi,  amillər də  uşağın dünyanı qavrama tərzinə, özünə və başqalarına münasibətinə ciddi təsir göstərir.

Mirsadiq Muxtarov vurğulayıb ki, belə şəxslərdə özünəinamın aşağı olması, insanlara güvənməkdə çətinlik və sosial adaptasiya problemləri müşahidə oluna bilər. Uşaqlıqda kifayət qədər sevgi və dəstək görməyən insanlar yetkinlik dövründə münasibətlərdə həddindən artıq ehtiyatlı olur və ya daim təsdiq və diqqət axtarmağa meyl edirlər.

Psixoloq, həmçinin, bildirib ki, uşaqlıq travmaları insanın gələcəyini mütləq müəyyən etmir. Adaptasiya qabiliyyəti, vaxtında göstərilən psixoloji dəstək, sağlam sosial mühit və anlayışlı münasibətlər travmanın təsirini azaltmağa kömək edə bilər. Müasir psixologiyada tətbiq olunan psixoterapiya üsulları vasitəsilə insanlar yaşadıqları çətinliklərin öhdəsindən gələ və həyat keyfiyyətlərini  yaxşılaşdıra bilərlər. Müsahibədə, həmçinin, vurğulanıb ki, uşaqların emosional ehtiyaclarını anlamaq, onları dinləmək və təhlükəsiz mühit yaratmaq psixoloji sağlam fərdlərin formalaşmasında mühüm rol oynayır.

https://tehsil365.news/az/news/55240/