Yaponiyanın Azərbaycandakı səfirliyinin təşkilatçılığı ilə 2026-cı il martın 6-da Xəzər Universitetinin  Mərmər  zalında kendo idman növünə həsr olunmuş  seminar formatlı tədbir keçirilib. Tədbirdə kendo üzrə mütəxəssis   Masanori Yasue və Xəzər Universitetinin tələbələri iştirak ediblər.

Seminar Masanori Yasuenin tələbələri salamlaması və açılış nitqi ilə başlayıb. O, çıxışı zamanı Yaponiyanın ənənəvi döyüş sənətlərindən  olan kendo haqqında ətraflı məlumat verib, bu idman növünün tarixi, fəlsəfəsi və əsas prinsiplərindən danışıb.

Tədbir interaktiv formatda təşkil olunub. Tələbələr kendo üzrə əsas hərəkətlər və texnikalarla tanış olublar. Həmçinin,  praktiki məşğələ zamanı iştirakçılar bu hərəkətləri sınaqdan keçirmək imkanı əldə ediblər. Tələbələr mövzu ilə bağlı müxtəlif suallar verib, mütəxəssislə fikir mübadiləsi də  aparıblar.

Seminar iştirakçılar tərəfindən böyük maraqla qarşılanıb, yapon mədəniyyəti və döyüş sənətləri ilə yaxından tanışlıq  baxımından faydalı olub.