Xəzər Universitetinin Həyat elmləri departamentinin müdiri Dr. Cəmalə Eldarova və departamentin dosenti  Dr. Cavid Ocaqinin iştirakı ilə 2026-cı il martın 3-də  V.Y. Axundov adına Elmi-Tədqiqat Tibbi Profilaktika İnstitutunda görüş keçirilib.  

İnstitutun direktoru  Prof. Adil Allahverdiyev  müəssisənin əsas fəaliyyət istiqamətləri, həyata keçirilən elmi-tədqiqat layihələri, tibb sahəsində aparılan fundamental və tətbiqi araşdırmalar barədə geniş məlumat verib. Qonaqlar   institutun maddi-texniki infrastrukturu ilə yaxından tanış olublar. Müasir elmi tədqiqatların aparılması üçün yaradılmış müxtəlif laboratoriyalar, klinik bölmələr, həmçinin,  zəngin elmi ədəbiyyat fonduna malik kitabxana ilə tanışlıq böyük maraq doğurub.

Görüş zamanı tərəflər arasında biotibb, molekulyar biologiya, biotexnologiya və həyat elmlərinin digər istiqamətlərində birgə elmi-tədqiqat layihələrinin  reallaşdırılması,  akademik əməkdaşlığın genişləndirilməsi, gənc tədqiqatçıların və yüksək ixtisaslı kadrların hazırlanması, eləcə də elmi bilik və texnologiyaların mübadiləsi  istiqamətində perspektiv əməkdaşlıq imkanları müzakirə olunub. Görüşün sonunda iki elmi qurum arasında elmi-tədqiqat və akademik əməkdaşlığın institusional əsasda inkişaf etdirilməsi məqsədilə qarşılıqlı əməkdaşlıq haqqında memorandumun imzalanmasının nəzərdə tutulduğu qeyd edilib.