24 fevral 2026-cı il tarixində Xəzər Universitetinin Tarix və Arxeologiya Departamentinin müdiri, Dos. Telman Nüsrətoğlu AZƏRTAC-da “Azərbaycan sülh təşəbbüslərində fəal mövqeyi ilə beynəlxalq nüfuzunu möhkəmləndirir” mövzusunu şərh edib.

Departament müdiri bildirib ki, 2020-ci il sentyabrın 27-də başlayan və 44 gün davam edən Vətən müharibəsi Azərbaycanın müasir tarixində dönüş nöqtəsi olmaqla yanaşı, beynəlxalq hüququn tətbiqi baxımından mühüm mərhələ kimi dəyərləndirilməlidir. Onun sözlərinə görə, münaqişənin tarixi kökləri XX əsrin əvvəllərinə gedib çıxır, 1991-ci ildən sonra Ermənistanın hərbi təcavüzü nəticəsində Azərbaycan ərazilərinin bir hissəsi işğal olunub. 1993-cü ildə BMT Təhlükəsizlik Şurasının qəbul etdiyi 822, 853, 874 və 884 nömrəli qətnamələr uzun müddət icra edilməyib.

Dos.Telman Nüsrətoğlu qeyd edib ki, 2020-ci ildə həyata keçirilmiş hərbi əməliyyatlar BMT Nizamnaməsinin 51-ci maddəsinə uyğun olaraq özünümüdafiə hüququ çərçivəsində aparılıb və nəticədə ölkənin ərazi bütövlüyü bərpa edilib. O vurğulayıb ki, əməliyyatlar zamanı beynəlxalq humanitar hüququn norma və prinsiplərinə riayət olunub.

Departament müdiri bildirib ki, 10 noyabr 2020-ci il tarixli üçtərəfli bəyanatdan sonra regionda yeni siyasi reallıqlar formalaşıb. Postmünaqişə mərhələsində delimitasiya, kommunikasiyaların açılması və sülh müqaviləsinin hazırlanması istiqamətində aparılan danışıqlar Cənubi Qafqazda uzunmüddətli sabitlik üçün mühüm zəmin yaradır.

Dos.Telman Nüsrətoğlunun fikrincə, qlobal geosiyasi dəyişikliklər fonunda beynəlxalq təhlükəsizlik sisteminin, xüsusilə BMT Təhlükəsizlik Şurasının fəaliyyət mexanizmlərinin təkmilləşdirilməsi zəruridir. Azərbaycan isə balanslaşdırılmış və çoxtərəfli xarici siyasət kursu ilə regional və qlobal sülh təşəbbüslərində fəal iştirak edərək beynəlxalq nüfuzunu möhkəmləndirir.