Beynəlxalq Ana Dili Günü münasibətilə 2026-cı il fevralın 21-də Xəzər Universitetinin     “Dünya” məktəbində  “Cəlil işığı” adlı monotamaşanın  premyerası olub.

  Xəzər Universitetinin qurucusu,  Prof.Akad.  Hamlet İsaxanlı, rektor Dr. Raziyə  İsayeva, “Dünya” məktəbinin direktoru Aygün İsayeva,həmçinin, Qurban Qurbanov, Kamal Yaşar, Xəzər Süleymanlı, Qulu Ağsəs və Qəmər Seyfəddinqızı kimi tanınmış ziyalı və ictimaiyyət nümayəndələri tamaşaya baxıblar.

Səhnə əsəri görkəmli yazıçı və maarifçi Cəlil Məmmədquluzadənin zəngin həyat yoluna və ədəbi irsinə həsr edilib. Böyük ədibin  ana dilinin saflığı və inkişafı uğrunda apardığı mübarizə, cəmiyyətin maariflənməsi istiqamətində gördüyü işlər və yaşadığı dövrün ictimai-siyasi mühiti obrazlı şəkildə  tamaşaçılara çatdırılıb.

Tamaşa məktəbin müəllim və şagirdləri tərəfindən hazırlanıb.  Ssenari müəllifi Fidan Məmmədova, rejissor Murad Allahverdi, layihənin təşkilatçısı isə Şükufə İsmayılovadır.

Tamaşadan sonra  Səməd Vurğun, Nəbi Xəzri, Mikayıl Müşfiq, Musa Yaqub, Ramiz Rövşən və Hamlet İsaxanlının şeirləri səsləndirilib. Eyni zamanda, Güney Azərbaycandakı soydaşlarımızın ana dilinə bağlılığı və milli-mənəvi dəyərlərə sədaqəti xüsusi qeyd edilib.