“2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Azərbaycan Respublikası Elm və Təhsil Nazirliyi və Xəzər Universiteti ilə üçtərəfli müqavilə əsasında London Universitet Kolleci (İngiltərə) universitetində təhsil alan doktorant Aygün Bədəlovanın iştirakı, həmçinin, Xəzər Universitetinin Təbiət elmləri, sənət və texnologiya yüksək təhsil fakültəsinin və Həyat elmləri departamentinin təşkilatçılığı ilə 2026-cı il  fevralın 20-də  “Yaddaş necə formalaşır, necə möhkəmləndirilə bilər və güclü yaddaşa necə sahib ola bilərik?” mövzusunda seminar təşkil edilib.

Seminar zamanı yaddaşın beyində hansı nahiyələrdə və necə formalaşdığı, qısa və uzunmüddətli yaddaşın xüsusiyyətləri, emosiyaların, yuxunun və stressin yaddaşa təsiri, eləcə də, unutqanlığın əsas səbəbləri barədə ətraflı bəhs olunub.  İnteraktiv tapşırıqlar vasitəsilə iştirakçılara diqqətin yaddaş prosesindəki rolu əyani şəkildə nümayiş  etdirilib, həmçinin, yaddaşı gücləndirməyə kömək edən praktik strategiyalar paylaşılıb.  Seminarda Xəzər Universitetinin müəllim və tələbələri fəal iştirak ediblər.