Meksika Birləşmiş Ştatlarının Azərbaycan Respublikasında fövqəladə və səlahiyyətli səfiri  Mariya Viktoriya Romero Kabalyero 2026-cı il fevralın 18-də Xəzər Universitetində olub. Səfir universitetin rektoru Dr. Raziyə  İsayeva ilə  görüşüb.

Görüş zamanı səfirliklə universitet arasında əməkdaşlığın mümkün istiqamətləri və birgə layihələr müzakirə olunub, xüsusilə, Panamerikana Universiteti ilə potensial tərəfdaşlıq imkanlarına diqqət yetirilib. Səmərəli və konstruktiv mühitdə keçən görüşün sonunda səfirə xatirə hədiyyəsi təqdim edilib.

Sonra Xəzər Universiteti ilə Meksika Birləşmiş Ştatlarının Panamerikana Universiteti arasında ali təhsil və tədqiqat sahəsində əməkdaşlığın genişləndirilməsi məqsədilə Anlaşma Memorandumu (MoU) imzalanıb.

İmzalanma mərasimində Xəzər Universitetini rektor Dr. Raziyə İsayeva və Beynəlxalq əlaqələr şöbəsinin müdiri Dr. Firuz Süleymanov, Panamerikana Universitetini isə Beynəlxalq əlaqələr şöbəsinin direktoru Paulina Leon təmsil edib. Tədbirdə, həmçinin,  Meksika Birləşmiş Ştatlarının Azərbaycan Respublikasında fövqəladə və səlahiyyətli səfiri Mariya Viktoriya Romero Kabalyero, eləcə də Azərbaycan Xarici İşlər Nazirliyinin nümayəndəsi Seymur Fətəliyev iştirak edib.

Görüş çərçivəsində iki universitet arasında əməkdaşlıq imkanları, mübadilə proqramları və əlaqələrin gücləndirilməsi müzakirə olunub, növbəti addımlarla bağlı fikir mübadiləsi aparılıb.  Tərəflər akademik əlaqələrin inkişaf etdirilməsi və davamlı əməkdaşlığın qurulması istiqamətində fikirlərini bölüşüblər.

Memorandum çərçivəsində tələbə və müəllim mübadiləsi, yay məktəbləri və qısa müddətli akademik kursların təşkili planlaşdırılır. Bundan əlavə, razılaşma birgə elmi-tədqiqat layihələrinin, seminar və konfransların təşkili və ortaq tədris proqramlarının hazırlanmasını da əhatə edir. Tərəflər vurğulayıblar ki, bu əməkdaşlıq Azərbaycan və Meksika arasında akademik və mədəni əlaqələrin inkişafına mühüm töhfə verəcək.