Xəzər Universitetinin İqtisadiyyat və menecment fakültəsinin bakalavr məzunu Tağı Məmmədov beynəlxalq akademik mühitdə əldə etdiyi uğurlarla seçilən gənc məzunlarımızdandır. O, magistr təhsilini Çin Xalq Respublikasının Beijing Texnologiya İnstitutunda uğurla başa vurmuş, hazırda isə həmin ölkədə Jiangsu Universitetində Ph.D səviyyəsində təhsilini davam etdirir.

2025-ci ildə Tağı Çin Beynəlxalq Televiziya proqramına dəvət olunaraq, dünya tamaşaçıları ilə Çindəki həyat təcrübəsini bölüşüb. Elə həmin il o, Azərbaycan Dövlət Televiziyası və digər aparıcı media qurumlarına verdiyi müsahibələrdə vətənindəki insanlara Çində təhsil və həyat barədə danışıb. Həmçinin o, Jiangsu Universiteti Partiya Komitəsinin Təbliğat Şöbəsi tərəfindən yayımlanmış rəsmi qərara əsasən, 2025-ci il üzrə universitetdə “Kampusun Yaxşı Netizeni” (“校园好网民”) fəxri ada layiq görülmüşdür. Belə ki, universitet üzrə cəmi 10 nəfər tələbə bu fəxri ada layiq görülmüşdür. Tağı bu fəxri ada layiq görülən tələbələr arasında universitet üzrə yeganə xarici tələbə idi. O, Xaricdə Təhsil İnstitutunu təmsil edərək, “Şəbəkədə müsbət enerji” (“网络正能量类”) kateqoriyası üzrə fərdi şəkildə mükafatlandırılmışdır. Bu mükafat universitetin rəqəmsal mühitdə sağlam, məsuliyyətli və nümunəvi fəaliyyət göstərən tələbələri təşviq etməsi baxımından mühüm əhəmiyyət daşıyır. Eyni zamanda, xarici tələbələrin də Çindəki universitet mühitində önəmli rol oynadığını nümayiş etdirən dəyərli bir nümunədir.

Bu yaxınlarda Tağı qış tətili ilə əlaqədar Vətəndə olduğu zaman, Chinese Bridge House youtube kanalına müsahibə vermişdir. Belə ki, öz müsahibəsində o, akademik və peşəkar yolunun məhz Xəzər Universitetində formalaşmağa başladığını xüsusi vurğulayır. O qeyd edir ki, universitetdə təqdim olunan əlavə xarici dil imkanları və beynəlxalq mühitə açıq təhsil yanaşması onun xaricdə təhsil almasına və qlobal akademik mühitə inteqrasiyasına mühüm töhfə verib.

Məzunumuzun hekayəsi hazırkı tələbələr üçün motivasiyaedici nümunədir. Tağı gənclərə fürsətləri vaxtında dəyərləndirməyi, əlavə dillər öyrənməkdən çəkinməməyi, məqsədyönlü və səbrli olmağı tövsiyə edir. Onun sözlərinə görə, bu gün atılan kiçik addımlar gələcəkdə insanı dünyanın ən uzaq nöqtələrinə aparan böyük uğurlara çevrilə bilər.

Tağı Məmmədovun müsahibəsi  aşağıdakı linkdə:

https://www.youtube.com/watch?v=av8dbY7Jg-Q