2026-cı il fevralın 19-da Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnnovasiyalar Mərkəzinin "Gələcək üçün bacarıqlar” layihəsinin növbəti mərhələsi olan IV TUSİ inkubasiya proqramı çərçivəsində “Demo Day” tədbiri keçirildi. Tədbirdə Xəzər Universitetini rektor Dr. Raziyə İsayeva təmsil etdi.

Tədbirdə Dövlət Agentliyinin sədri Ülvi Mehdiyev, Elm və Təhsil nazirinin müavini Firudin Qurbqnov, Kiçik və Orta Biznesin İnkişafı Agentliyinin idarə heyətinin sədri Orxan Məmmədov,  BP-nin Xəzər bölgəsində Xarici əlaqələr və kommunikasiya üzrə vitse - prezidenti Bəxtiyar Aslanbəyli, ölkə universitetlərinin rektorları, nazirlik və agentliyin əməkdaşları, mentorlar, inkubasiya proqramı iştirakçıları iştirak etdilər.

“Demo Day” tədbirində inkubasiya proqramı iştirakçıları tərəfindən hazırlanmış innovativ layihələrin təqdimatı keçirildi, eyni zamanda layihənin davamı olaraq “V Tusi” inkubasiya proqramının başlanması elan olundu.

Qeyd edək ki, 2021-ci ilin aprel ayından həyata keçirilən “Gələcək üçün bacarıqlar” layihəsinin məqsədi ali təhsil mərkəzlərində innovativ düşüncənin təşviqi, gənclərin praktik bacarıqlarının inkişafı və innovasiya ekosistemi üçün dayanıqlı kadr potensialını formalaşdırmaqdır.