Xəzər Universitetinin Beynəlxalq əlaqələr şöbəsi  2026-cı il fevralın 17-də Mərmər zalda məlumat sessiyası təşkil edib. Sessiyada bütün fakültələrdən yerli və beynəlxalq tələbələr, həmçinin fakültə koordinatorları iştirak ediblər. Sessiyanın əsas məqsədi şöbə əməkdaşları tərəfindən tələbələri Azərbaycan Respublikasında təhsil və yaşayışları ilə bağlı mühüm inzibati, miqrasiya və təhlükəsizlik məsələləri, həmçinin mübadilə proqramları barədə məlumatlandırmaq idi.

Birinci sessiya universitet haqqında ətraflı təqdimatla başlayıb. İştirakçılara Xəzər Universiteti, onun missiyası və akademik mühiti, universitetdə fəaliyyət göstərən fakültələr, tədqiqat mərkəzləri, laboratoriyalar və digər akademik bölmələr, həmçinin kampus imkanları, yataqxana, tələbə xidmətləri və mövcud infrastruktur haqqında ətraflı məlumat verilib.

Beynəlxalq əlaqələr şöbösinin roluna, yerli və beynəlxalq tələbələrə göstərdiyi dəstək xidmətlərinə xüsusi diqqət yönəldilib, o cümlədən sənədləşdirmə üzrə məsləhət, mobillik imkanları və inzibati dəstək barədə məlumatlar təqdim edilib. Bundan əlavə, universitetə qəbul prosedurları izah olunub, tələb olunan sənədlər, ərizə mərhələləri və uyğunluq meyarları qeyd olunub.

Sessiyanın ikinci hissəsində miqrasiya prosedurları haqqında qaydalar nəzərə çatdırılıb. Buraya qeydiyyat tələbləri, müvəqqəti yaşayış icazələri, viza ilə bağlı məsələlər, uzatma və dəyişiklik prosedurları, tələb olunan sənədlər, son tarixlər və tələbələrin öhdəlikləri daxildir. İştirakçılar, həmçinin, yaşadıqları yerdə qeydiyyat və müvafiq qaydalar, o cümlədən Təhsil Sektorunda Keyfiyyət Təminatı Agentliyi (TKTA) barədə məlumatlandırılıb.

Sonuncu sessiya beynəlxalq mobillik imkanlarına həsr olunub. Erasmus+ mübadilə proqramları, ikitərəfli əməkdaşlıq müqavilələri və universitetdə mövcud olan ikili diplom, təhsil və təcrübə mobilliyi, tərəfdaş universitetlər, müraciət tələbləri, seçmə meyarları və ümumi mobillik prosesi barədə məlumat təqdim edilib. Sessiya interaktiv sual-cavab bölməsi ilə yekunlaşıb.

Məlumat sessiyası universitet icmasında ünsiyyətin gücləndirilməsi, məlumatlılığın artırılması və şəffaflığın təmin edilməsi üçün vacib platforma rolunu oynayıb.