2026-cı il fevralın 18-də Xəzər Universitetində rektor Dr. Raziyə İsayeva ilə  məzun - sənaye və biznes əməkdaşlığı istiqamətində işgüzar görüş keçirilib.

Görüşdə universitetin əməkdaşları ilə yanaşı, universitetin məzunu, FireWorks HRM şirkətinin direktoru Laura Həmidova da iştirak edib. Laura Həmidova insan resurslarının idarə edilməsi sahəsində 20 ildən artıq peşəkar təcrübəyə malikdir. O, eyni zamanda, Vilnüs Universiteti Biznes Məktəbində “İnsan resursları” fənnini tədris edir və hazırda "Təşkilati mədəniyyət" mövzusu üzrə PhD səviyyəsində elmi tədqiqatlar aparır.

Görüş zamanı təhsil - sənaye və biznes əməkdaşlığının inkişafı, akademik biliklərin təcrübi  bacarıqlarla uzlaşdırılması, birgə layihələrin icrası, təcrübəyönümlü təşəbbüslərin təşkili, eləcə də tələbə və məzunların əmək bazarına daha səmərəli inteqrasiyası məsələləri ətraflı müzakirə olunub.

Rektor Dr. Raziyə  İsayeva məzunların peşəkar fəaliyyətinin universitet üçün strateji əhəmiyyət daşıdığını qeyd edərək, məzun – universitet - sənaye əməkdaşlığının gücləndirilməsinin Xəzər Universitetinin prioritet istiqamətlərindən biri olduğunu vurğulayıb.

Görüş ilkin tanışlıq və perspektivlərin müəyyənləşdirilməsi məqsədi daşıyıb. Tərəflər gələcəkdə təhsil - sənaye əməkdaşlığı çərçivəsində qarşılıqlı faydalı və davamlı birgə layihələrin həyata keçirilməsi istiqamətində iş birliyinin davam etdirilməsində maraqlı olduqlarını bildiriblər.