Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsi (YYÇPİTB) ”Narkomaniyaya yox deyək!” mövzusunda maarifləndirici tədbirləri davam etdirir.Bölmənin  təşkilatçılığı ilə 2026-ci il fevralın 13-də Bakının Suraxanı rayonu Bakıxanov qəsəbəsindəki 72 nömrəli tam orta məktəbdə keçirilən seminar da bu mövzuda idi.

Seminarda Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov maddə asılılığının cəmiyyətdə doğurduğu psixoloji və sosial fəsadlardan danışıb.  Bildirib ki, maddə asılılığının yaranmasına təsir edən əsas amillər sırasında ailədaxili problemlər, sosial mühitin mənfi təsiri, yaşıd təzyiqi və psixoloji gərginlik xüsusi yer tutur. Psixoloqun sözlərinə görə, vaxtında müdaxilə olunmadıqda bu hallar həm fərdin sağlamlığına ciddi zərər vurur, həm də sosial münasibətlərdə dərin çatlar yaradır. Psixoloq profilaktik tədbirlərin gücləndirilməsinin və maarifləndirici layihələrin daha geniş miqyasda həyata keçirilməsinin vacibliyini vurğulayıb. Qeyd olunub ki, ailə və təhsil mühiti risklərin azaldılmasında həlledici rol oynayır. Sağlam həyat tərzinin təşviqinin  gənclərin düzgün formalaşması və onların gələcək inkişafı üçün əsas şərtlərdən biri olduğu diqqətə çatdırılıb.

Tədbirdə Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin rəisi, polis polkovniki İbrahim İsmayılov, bölmənin inspektorları- polis mayoru Afaq Əliyeva və polis baş leytenantı Aysel Hacıyeva, Bakı Narkoloji Mərkəzin sosioloqu Fidan Ataxanlı iştirak ediblər.

Tədbir şagird və müəllim heyətinin fəal iştirakı ilə interaktiv şəkildə keçirilib, mövzu ətrafında geniş fikir mübadiləsi aparılıb..