2026-cı il fevralın 17-də Bakıdakı Radisson hotelində Britaniya Şurası (British Council) və Xəzər Universitetinin birgə ev sahibliyi ilə “Going Global Partnership” proqramı çərçivəsində Transmilli Təhsil (TNE) Forumu keçirilib.

Tədbirdə Böyük Britaniyanın Azərbaycandakı səfiri Fergus Auld, Britaniya Şurasının ölkə üzrə direktoru Nərgiz Hacıyeva, Xəzər Universitetinin rektoru Dr.Raziyə İsayeva, Britaniya Şurasının Ali təhsil sistemləri və beynəlmiləlləşmə üzrə rəhbəri Eduardo Ramos (onlayn), Şərqi London Universiteti “Global Campus” un icraedici direktoru Dr. Gulnara Stover, Heriot Vatt Universitetinin Beynəlxalq inkişaf şöbəsinin rəhbəri Jared Phillippi, Azərbaycan Dövlət Neft və Sənaye Universitetinin rektoru Rüfət Əzizov, Bakı Ali Neft Məktəbinin Beynəlxalq əlaqələr departameninin rəhbəri Könül Məhərrəmova, Azərbaycan Texniki Universitetində Belfast  Universitetindən olan qonaq professor Dr. Vahid Garousi çıxış ediblər.

Xəzər Universitetinin rektoru Dr. Raziyə İsayeva  “Beynəlmiləlləşməyə yeni baxış: Xəzər Universitetinin Transmilli Ali Təhsil Modeli” (Reimaging internationalization: Khazar University’s model of Transnational Higher Education) mövzusunda çıxış edərək, universitetin transmilli təhsil təcrübəsini bölüşdü. Qeyd etdi ki, forumun əsas məqsədi Azərbaycan və Böyük Britaniya arasında transmilli təhsil təşəbbüslərinin gücləndirilməsi və genişləndirilməsi, transmilli təhsilin inkişafını dəstəkləyən ali təhsil mexanizmləri və alətlərini araşdrmaqdır.

Xəzər Universiteti forumda, həmçinin dekanlar, departament müdirləri və digər əməkdaşlarla təmsil olunub.

Forumda TNE-nin tətbiqində ən yaxşı təcrübələrə malik yerli universitetlərlə  yanaşı, Şərqi London Universitetinin Global Campus, Belfast Universiteti, Heriot-Vatt Universiteti kimi beynəlxalq universitetlərin ekspertlərinin də təqdimatları  baş tutub.