Humanitar, təhsil və sosial elmlər fakültəsinin Tarix müəllimliyi ixtisası üzrə təhsil alan IV kurs tələbəsi Könül İbrahimli Arxeoloji dərnəyin sədri təyin olunub

2026-cı il vevralın 13-də Azərbaycan Milli Elmlər Akademiyasının Arxeologiya və Antropologiya İnstitutunda Arxeoloji Dərnəyin təqdim olunmasına həsr edilmiş iclas keçirilib.

Tədbirdə institutun direktoru Dos.  Fərhad Quliyev, institutun elmi katibi Dos.  Ellada Bəkirova, institutun aparıcı elmi işçisi Dos.  Pərviz Qasımov və Xəzər Universitetinin Tarix və arxeologiya departamentinin müəllimi Dr. Yaqub Məmmədov, Arxeoloji Dərnəyin təsisçisi və qurucuları – institutun Elmi ekspozisiyanın təşkili şöbəsinin müdiri və Xəzər Universitetinin Tarix və arxeologiya departamentinin müəllimi Orxan Zamanov, şöbə əməkdaşları Nuranə Həsənova və Türkan Əliyeva, həmçinin müxtəlif universitetlərdə təhsil alan tələbələr, o cümlədən Xəzər Universitetinin tələbələri də iştirak ediblər.

Tədbiri giriş sözü ilə açan institutun direktoru Dos.  Fərhad Quliyev institut rəhbərliyinin innovativ və əsaslandırılmış təşəbbüslərə hər zaman açıq olduğunu bildirib. Tədbirdə dərnəyin sədri, Xəzər Universitetinin Humanitar, təhsil və sosial elmlər fakültəsinin (HESS) Tarix müəllimliyi ixtisası üzrə təhsil alan IV kurs tələbəsi Könül İbrahimli və katibi - Tarix müəllimliyi ixtisası üzrə təhsil alan II kurs tələbəsi Nəzrin Quliyeva gələcək fəaliyyət strategiyası barədə məruzə  ediblər. İclas zamanı Arxeoloji Dərnəyin yaradılma məqsədi, struktur quruluşu və fəaliyyət istiqamətləri barədə geniş məlumat verilib. Qeyd olunub ki, dərnəyin əsas məqsədi gənclərin arxeologiya sahəsində elmi araşdırmalara cəlb olunması, milli-mədəni irsin qorunması və təbliği istiqamətində təşəbbüslərin dəstəklənməsidir.

Təqdimatdan sonra dərnək üzvləri tərəfindən müxtəlif layihə təklifləri bildirilib. Dərnəyin idarə heyətinin üzvü, Xəzər Universitetinin Tarix-Coğrafiya müəllimliyi ixtisası üzrə təhsil alan IV kurs tələbəsi Aysel Həsənovanın “Arxeoloji abidələrin monitorinq platforması”, dərnəyin idarə heyətinin üzvü və sərgi qrupunun koordinatoru Mətanət Teymurlunun “Keçmişin sədası” və media qrupunun koordinatoru, Xəzər Universitetinin Tarix-coğrafiya müəllimliyi ixtisası üzrə təhsil alan III kurs tələbəsi Saləddin Qoçuzadənin “Qarabağ irsi 360°” layihələri müzakirələrə səbəb olub. Təqdimatlar ətrafında geniş fikir mübadiləsi aparılıb, layihələrin praktik icra imkanları dəyərləndirilib və bir sıra istiqamətlər üzrə ilkin razılaşmalar əldə olunub.

Müzakirələr zamanı Dr. Yaqub Məmmədov Azərbaycan arxeoloji abidələrinin sistemləşdirilmiş xəritəsinin hazırlanmasının elmi və maarifləndirici baxımdan əhəmiyyətini xüsusi qeyd edib. Tədbirin sonunda direktor Dos.  Fərhad Quliyev təqdim olunan təşəbbüslərlə bağlı rəy və tövsiyələrini bölüşərək, dərnəyin fəaliyyətinin mərhələli və konseptual şəkildə qurulmasının vacibliyini vurğulayıb.