2026-cı il fevralın 12-də Xəzər Universitetinin Karyera və Məzunlar Mərkəzi və İqtisadiyyat və menecment fakültəsinin birgə təşkilatçılığı ilə universitet əməkdaşları üçün “Peşə etikası və təşkilati davranış” mövzusunda təlim keçirilmişdir.

Təlim məşhur motivasiya müəllifi Jon Gordon`un “Soup” (“Şorba”) kitabı əsasında hazırlanmış proqram üzrə təşkil olunmuşdur. Sessiya çərçivəsində təşkilati mədəniyyətin əsas “inqrediyentləri” – müsbət yanaşma, ortaq dəyərlər, sağlam münasibətlər, liderlik nümunəsi və fərdi məsuliyyət anlayışı geniş müzakirə edilib.

Təlimin açılışında Karyera və Məzunlar Mərkəzinin direktoru Zərifə Əliyeva çıxış edərək, təlimin məqsəd və əhəmiyyətindən bəhs edib

Access Bankın Təhsil və inkişaf şöbəsinin rəhbəri, təlimçi Xumar Hüseynovanın Xəzər Universitetinin uzun illərdir əməkdaşı, həmçinin Xəzər Universitetinin məzunu olması tədbirə xüsusi dəyər qatıb. O, çıxışı zamanı öz tələbəlik və peşəkar fəaliyyət təcrübəsinə istinad edərək, universitet mühitini daha yaxından tanıdığını vurğulayıb. Təlimçi mövzuları yalnız nəzəri çərçivədə deyil, həm də Xəzər Universitetində baş vermiş real hadisələr və iş təcrübələri əsasında izah edib. Bu yanaşma iştirakçıların mövzunu daha dərindən qavramasına və müzakirələrə daha fəal qoşulmasına şərait yaradıb.

İnteraktiv formatda keçirilən təlimdə iştirakçılar komanda daxilində enerjinin ümumi nəticələrə təsiri, münasibətlərin iş keyfiyyətinə təsiri və problemlərə həll yönümlü yanaşmanın əhəmiyyəti barədə fikir mübadiləsi aparıblar. Vurğulanıb ki, hər bir əməkdaşın davranışı və yanaşması bütövlükdə təşkilati mühitin formalaşmasında həlledici rol oynayır. “Şikayətlə deyil, həll ilə gəlmək”, “öz davranışınla nümunə olmaq” və “davamlı inkişafı şəxsi məsuliyyət kimi qəbul etmək” kimi əsas mesajlar təlimin mərkəzi xəttini təşkil edib.

Sessiya zamanı real situasiyalar üzərində qrup işi və müzakirələr təşkil olunub. İştirakçılar peşə etikası və təşkilati davranış mövzusunda yeni baxış bucaqları qazandıqlarını və komanda daxilində daha sağlam iş mühiti formalaşdırmaq üçün konkret addımlar müəyyənləşdirdiklərini bildiriblər.

Bu təşəbbüs universitet daxilində peşəkar əməkdaşlıq mədəniyyətinin gücləndirilməsi, dəyərlərə əsaslanan idarəetmə yanaşmasının təşviqi və məzun - universitet əlaqələrinin möhkəmləndirilməsi baxımından əhəmiyyətli addım kimi qiymətləndirilib.

Təlimin sonunda isə ən vacib məqam vurğulanıb: təşkilati mədəniyyət sənədlərlə deyil, insanlarla formalaşır, hər bir əməkdaş öz davranışı, enerjisi və yanaşması ilə universitetin ümumi atmosferinə təsir göstərir.