Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin (YYÇPİTB) təşkilatçılığı ilə 2026-cı il fevralın 12-də Bakının Suraxanı rayonunda yerləşən 87 nömrəli tam orta məktəbin rəhbərliyi və müəllim kollektivi ilə “Məktəbdə şagirdlərin riskli davranışlarının erkən aşkarlanması və müəllimin rolu” mövzusunda profilaktiki və maarifləndirici seminar keçirilib.

Tədbirdə Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov çıxış edərək məktəb mühitində müşahidə olunan riskli davranışların psixoloji və sosial səbəblərinə toxunub. O, aqressiya, dərsdən yayınma, asılılıq meyilləri, deviant davranış və sosial təcrid kimi halların erkən mərhələdə müəyyən edilməsinin vacibliyini vurğulayıb. Bildirib ki, müəllimlər şagirdlərlə gündəlik ünsiyyətdə olduqları üçün ilkin əlamətləri vaxtında fərq edə və uyğun istiqamətləndirmə həyata keçirə bilərlər. Psixoloq, eyni zamanda, məktəb–ailə əməkdaşlığının gücləndirilməsinin, psixoloji maarifləndirmə tədbirlərinin artırılmasının və sağlam psixososial mühitin formalaşdırılmasının riskli davranışların qarşısının alınmasında mühüm rol oynadığını diqqətə çatdırıb.

Tədbirdə Bakı şəhər Baş Polis İdarəsinin Yetkinlik Yaşına Çatmayanlarla Profilaktiki işin təşkili bölməsinin rəisi, polis polkovniki İbrahim İsmayılov, həmin bölmənin inspektoru polis baş leytenantı Aysel Hacıyeva, Suraxanı Rayon Polis İdarəsinin YYÇPİTB-nin rəisi Əfqan Ağayev və inspektorları iştirak etmişdir.

Tədbir müəllim və məktəb heyətinin fəal iştirakı ilə interaktiv formada keçirilmiş, mövzu ətrafında geniş fikir mübadiləsi aparılmış və iştirakçıları maraqlandıran suallar cavablandırılmışdır.